Wir^a nachgenempten Elzbeth Weberin von Burwald¹, Iohans, Veren vnd Adelhait ir elichu kind kundin vnd veriehin allerLmenglich mit disem offenn brief, das wir mit wolbedahtem mute vnd guter vorbetrahtunge von dem ersamen BarLtholome Blârer ze disen ziten pfleger vnd bumaister des munsters des lieben herren sant Gallen² ain gutli genant||
Burwald vnd ôch ze Burwald gelegen ist vns vnd vnsren erben frôwen als mannen tohtran als knaben ze ainem staten erblehen enpfangen habin vnd enpfahin in kraft dis briefs vmb ainen staten zins mit solicher beschaidenhait vnd in dem rehten, das wir vnd vnser erben das vorgeschriben gutli mit allen sinen rehten vnd zugehorden in eren vnd vnwustklich haben buwen vnd niessen sollen nach erblehens reht, vnd sollen dem obgenanten Bartholome Blârer vnd sinen nachkomen, welhi denn ie pfleger vnd bumaister des vorgeschriben munsters sint, nun hinnenhin nach datum dis briefs allerjarlich ie ze sant Martis tag ân alle abgeng vszug vnd widerred vnd allen iren schaden vor allermenglichem ab vnd von dem vorgeschriben gutlin ze rehtem jarlichem zins geben rihten vnd antwurten ze sant Gallen in der statt funff mut baider korn gutes vnd vngeuarliches Byschoffzeller³ messes. Welhes jares das nit geschach, so hât der obgenant Bartholome Blârer vnd sin nachkomen vnd iro helffer, wer die ie sint ald werdent, vollen gewalt vnd fryes vrlob, ie nach sant Martis tag, wenn sy wellent, vns vnd vnser nachkomen ze notent ze heftent ze pfendent vnd anzegriffent vff dem vorgeschriben gutlin vnd anderswa an allen vnsren ligenden vnd varenden gutern, wie die genamt oder wa sy gelegen sint, mit gaistlichem vnd weltlichem geriht vnd ân geriht ân zorn vnd ân klag, wie vnd wohin sy das getun mugent, als lang vnd als vil, vntz daz sy des selben zins, der inen also vsstund vnd nit worden wari, vnd da mit aller der schad, in den sy vnd iro helffer von des selben notentz heftentz pfendentz vnd angriffentz wegen komen warint, vsgeriht vnd gantzlich bezalt wirt, vnd dauor noch da wider sol vns noch vnser erben noch nachkomen niht schirmen noch gut sin kain burgreht lantreht fryhait ainvng gesetzt puntnust gesellschaft weder gaistlich noch weltlich geriht noch dehain andru sach fund noch vszug, die ietz vfferstanden funden ald erdaht sint ald die noch in kunftigen ziten vfferstând funden ald erdaht werdent. Vnd ze offemm wârem vrkund vnd vester sicherhait aller diure vorgeschriben dinge vnd vergicht so habin wir erbetten, won wir nit aigner insigel habin, den erbern Rudolffen Vorster, den man nemet Amman von Gossôw⁴, burger ze sant Gallen, das er sin insigel fur vns vnd vnser erben vnd nachkomen an disen brief gehenkt hât, des ich der selbe Rudolff Vorster offenlich an disem brief vergich mir vnd minen erben ân schaden. Geben an sant Matheus abent ze herbst in dem jare, do man zalt von Cristus geburt vierzehenhundert jar, darnach in dem zehenden jare.