Wir^a Burkart von gottes genaden abbt des gotzhuses ze Pfauers¹ sant Benedicten||
ordens in Churer bistum gelegen bekennent veriehent vnd tund kund vnd ze||
wissen allermanglichem mit disem gegenwurtigen brief, als Hainrich von Wilberg²||
ze koffen geben hât vmb funfhundert guldin an gold dem spital ze Raperswil³ disu nachgeschribnu guter, item des ersten den wald ze Bollingen⁴, item des Schniders hof, item des Schnetzers hof, item Vlis Engellinen hof vnd die reban ze Bolingen, das alles ze Bollingen obrent Wurmspach⁵ vnd vndrent Schmarikon⁶ gelegen vnd von vns vnd von vnserm vorgenanten gotzhus recht manlehen ist, item den hof ze Bollingen by der kilchen gelegen genant Grossvlis hof, der och von vns vnd von vnserm vorgenanten gotzhus recht zinslehen ist jarlich vff sant Martins tag vmb achtzehen schilling pfenning Zurcher werschafft, das da derselb Hainrich von Wilberg denselben koff mit vnserm guten willen wissen vnd verhengnust getân vnd vollfertgot hât mit vfgeben vnd allen andren sachen gehugden worten vnd werchen, so darzu gehort vnd notdurfftig was, vnd das wir mit guter zytiger vorbetrachtung die vorgenanten guter allu mit allen iren rechten nutzzen fruchten zugehorden vnd gewonhaiten dem fromen beschaidenn Hainrichen Russinger burger ze Raperswil an des vorgenanten spitals statt ze Raperswil alz vnserm vnsers gotzhus vnd vnsrer nachkomen rechten trager gelihen hând nach manlehens vnd zinslehens gewonhait vnd recht, vnd hând och das getân vnd vollfertgot mit allen gehugden worten vnd werchen, so darzu gehort vnd notdurfftig was. Vnd des alles ze ainem warem offem vrkund vnd ze ainer guten ewigen gezugnusz vnd festen bestatnusz so hând wir obgenanter abbt Burkart fur vns vnd vnser nachkomen vnser insigel offenlich gehaissen henken an disen brief. Der geben ist ze Wartenstain⁷ des jars, do man zalt nâch der geburt Christi vierzehenhundert jar, darnâch in dem zehenden jar, an dem nachsten samsztag vor sant Michels des hailigen furstengels tag.