Wir die nachbenempten Margretha Rudolffs von Grunenstain eliche frow, Cunrat von Grunenstain¹ ir elicher sune fur sich vnd sine geschwustrigot, Hans Oler keller zu Balga² vnd die gemainde vnd hofflut gemainlich zu Balga arm vnd rich, die vnser frowen gotzhusz zu Lindow³ zugehorend vnd vber die die von Grunenstain vogt sind, thund kunt vnd veriehent offenlich mit disem brieff allen, die in sehend oder horend lesen, daz vns die fromen wysen der burgermaister vnd der rat gemainlich der statt ze sant Gallen von vnser bett wegen ze burger angenomen vnd empfangen hand von disem huttigen tag hin, als dirre brieff geben ist, vntz vff den nachstkunfftigen sant Martis tag vnd dannenhin die nachsten funf gantze jar nachenander volle vsz vnd nach den funf jaren vntz an ain absagen, mit solicher beschaidenhait vnd in den rechten dingge vnd gedinge, als hienach geschriben staut vnd mit worten beschaiden ist. Des ersten ist beredt, daz wir nu vff den egenanten nachsten sant Martis tag inen dru pfund pfenning guter Costentzer muntz geben vnd zu rechter stur richten sond, vnd sollen inen denn dannenhin je vff sant Martis tag alle jar zu rechter stur siben pfund pfenning der vorgeschriben muntze geben weren vnd richten die vorgedachten funf jar vsz vnd dannenhin vntz an ain absagen. Wir die vorgenanten von Grunenstain sollen ouch mit namen an der egenanten stur aller jarlich pflichtig sin ze geben zway pfund pfenning vnd die egenanten von Balga funf pfund dn. der vorgenanten muntz. Beschach och, daz wir inrent den funf jaren inen abgetrungen wurden mit gewalt oder mit dem rechten, dauor got sye, dennocht sollen wir inen die stur, die dennocht an den funf jaren vssz stat, danne samendhafft mitenander ane furzug weren vnd bezalen vnd sollen der von in nicht ledig sin. Wir die vorgenanten von Grunenstain sollend in ouch mit vnser vesti Grunenstain getruwlich gewertig vnd ir offen husz sin zu aller ir not an geuarde. Beschach ouch, daz der egenant Rudolff von Grunenstain in den vorgenanten jarzilen als gesund wurd, daz er zu ainem man gut ware, so sollend wir inn darzu wisen, daz er ouch schwere, disz burggrecht ze halten volle vsz an geuarde. Alle alt stossz hand sy vns hindan vnd vszgesetzt. Beschach ouch, daz wir die vorgenanten von Grunenstain vnd wir die von Balga ir vogtlut mitenander stosszig wurden, diewile disz burggrecht werot, so sond vns baidtail die obgenanten der burgermaister vnd der rat ze sant Gallen darzu wisen vnd halten, daz wir zu baidersit gen enander thun vnd beliben sollen nach des anlassz brieffs vszwiszung lutt vnd sag, den wir gegen enander besigelt hand. War ouch, daz mir der obgenanten von Grunenstain andere kind in den egenanten jarzilen zu iren^a kamind, so sond sy disz burggrecht denn och schweren ze halten an geuarde. Wir die obgenanten baidtail sollen ouch mit namen dem burgermaister vnd dem raut zu sant Gallen disz burggrecht volle vsz gehorsam sin in allen sachen. Wir habend ouch allesamend vnd ieklichs vnder vns besunder willenklich geschworn ainen gelerten ayd zu got vnd zu den hayligen mit vffgebotten vingern, der egenanten statt vnd den burgern truw vnd warhait iren nutz ze furdern vnd iren schaden ze wenden, so verre wir mogen, vnd alle vorgeschriben stuck vnd artickel war vnd statt ze halten, an geuarde, doch mit namen vnser frowen gotzhusz zu Lindow vnd den von Grunenstain ir vogt an allen iren rechten gantzlich vnschadlich. Vnd des alles zu warem vrkunde so haben wir die vorgenanten von Grunenstain erbetten vnsern lieben oham Hansen von Ainwille⁴, daz er sin insigel fur vns gehenckt haut an disen brieff, wann wir aigner insigel nicht hand, im vnd sinen erben an schaden. Darzu hab ich obgenanter keller Hans Oler fur mich vnd die gemaind zu Balga von iro bett wegen ouch offenlich min insigel gehenckt an disen brieff. Der geben ist an dem nachsten zinstag nach sant Michels tag, in dem jar, do man zalt von Cristus geburtt vierzechenhundert jar vnd darnach in dem zechenden jare.