Wir Cun von gotz gnaden abt des gotzhus ze sant Gallen¹, das an alles mittel zu gehort dem stul ze Rom,||
tund kund vnd manglichem ze wissenn mit disem brief, das fur vns kam der beschaiden kneht Hans Husler von||
Rikkenbach² vnd braht fur vns, wie das Hans Vorster salig von Rikkenbach von vnserm vorgenanten gotzhus ze lehen||
gehebt hab zwo juchart akkers gelegen ze Rikkenbach bi Wil³, stoss ainhalb an Hofuri⁴ vnd andert an Nidren Wil⁵, vnd ist gelegen am Odensperg⁶, darzu nu Margareta des vorgenanten Johansen Vorsters elichi tohter des vorgedahten Hansen Huslers elichi wirtinne reht hab, vnd batt vns der ietz genempt Hans Husler ernstlich von der ietz genampten Margareten wegen, die im das sol han beuolhen nach siner sag, das wir den vorgenanten akker mit siner zu gehord lihint mit vnserm offenn besigelten brief der egenampten Margareten siner elichen frowen vnd im lihint ze lehen. Darvmb erhortant wir do ir bett gnadklich vnd lihent den selben vorgenanten akker mit allen sinen zu gehorden, als in Hans Vorster salig vntz an sinen tod inne gehebt vnd genossen hat, der egenanten Margareten siner elichen tohter Hansen Huslers elichen frowen vnd dem selben Hansen Husler mit ir mit disem offnen brief baiden ze lehen vnd ze ainer gemaind, was wir inen daran durch reht lihen sont, vns vnd vnserm vorgenanten gotzhus an allen vnsern rehten vnd gewonhaiten gantzlich vnschadlich vnd vnuergriffenlich. Vnd ist diss beschehen vnd redlich vollfurt nach vnsers gotzhus gewonhait vnd reht, als es crafft vnd maht haben sol vnd mag ietz vnd hie nach. Och gebent wir der egenanten Margareten dz ffrye manreht, das si das vorgenant lehen och haben vnd niessen besetzzen vnd entsetzzen mag, als ob si ain man war. Vrkund der warhait habent wir vnser abtye insigel offenlich gehenkt an disen brief. Der geben ist am samstag nahst vor sant Gallen tag nach Cristi geburt vierzehenhundert jar, darnach in dem zehenden jare.