Wir^a nachbenempten Hans Grunower vnd Niclaus Cristan ze disen ziten pfleger des spitales ze Rapreschwil||
vnd Heini Wernher spitalmeister daselbs tunt kunt vnd veriechen offenlich mit disem brief, als wir kofft||
haben von junkherr Heinrichen von Willberg ze des obgenanten spitales handen des ersten den Bollinger wald, item||
des Schniders hof, item des Schnetzers hof, item Vlis Engellinen hof vnd die reben ze Bollingen, daz alles obrent Wurmspach vnd vndrent Schmarikon gelegen vnd manlehen ist von dem erwirdigen herren dem abbt vnd sinem gotzhus ze Pfafers, item den hof gelegen ze Bollingen bi der kilchen genant Gross Vlis hof, der erblehen ist von dem obgenanten vnserm herren dem abt vnd von sinem gotzhus ze Pfafers vmb achtzehen schilling pfening gewonlicher Zuricher muntz jarlichs zinses nach des koffbriefs sag, so der egenant junkherr Heinrich von Wilberg dem vorgenanten spital daruber geben vnd besigelt hât, den selben koff der êrwirdig geischlich herr abt Burkart des vorgenanten gotzhus ze Pfafers von sinen gnaden mit siner hand willen vnd gunst vnd mit sinem brief vnd inisgel verhenget vnd bestatet hat, vnd hat die vorgenanten guter, die manlehen sind, gelihen junkherr Heinrichen Russinger burger ze Rapreschwil in tragers wise ze des vorgenanten spitales handen, daz da wir vorgenanten pfleger vnd meister des obgenanten spitales mit guten truwen fur vns vnd vnser nachkomenn gelopt vnd verheissen habent, als dik daz ze schulden kunt, daz ein trager des vorgenanten lehens abgat von todes wegen, daz wir denn dem obgenanten vnserm herren dem abt oder sinen nachkomenn vnd sinem gotzhus ein andern trager, der im nach lehens recht gedienen muge vnd der och des schwerre vnd daz vorgenant lehen enpfahe ze des vorbenempten spitales handen, geben vnd zuschiken sollent nach lehens recht inrent jares frist an alles verziehen vngeuarlich. Vnd des alles ze warem vrkund haben wir vorbenempten pfleger vnd meister des vorgenanten spitales insigel fur vns vnd vnser nachkomenn offenlich gehenkt an disen brief. Darnach vergich ich der vorgenant Heinrich Russinger, daz ich daz vorgeschriben lehen von dem obgenanten minem gnadigen herren dem abt ze des obgenanten spitales handen enpfangen vnd im geschworen han, alles daz ze tun vnd ze vollefurenn, daz ein man sinem rechtenn lehenherren von rechtz wegen vnd nach lehens recht billich tun sol vngeuarlich. Vnd des ze waremm vrkund han ich min eigen insigel offenlich gehenkt an disen brief. Der geben ist an sant Gallen tag nach Crists geburt vierzehen hundert jar, darnach in dem zehenden jare.