Ich^a grâf Fridrich von Toggenburg¹ grâf ze Brettengo² vnd ze Tafâus³ tun kund allermenglichem mit disem offenn brief, als mir min gnadigu herrLschafft von Osterrich etc. vnd die nâchbenempten schuldner vnd angulten grâf Wilhelm von Montfort herr ze Tettnang⁴, her Lienhart von JungLingen⁵, her Hans von Bodmen⁶ baid ritter vogt ze Veltkirch⁷ vnd ze Rinegg⁸, Vlrich von Amptz⁹, Rudolff von Roschach¹⁰ der elter vnd Hans||
Littscher stattamman ze Veltkirch¹¹ von derselben miner herrschafft wegen etwie vil gutz fur hobgut vnd schaden, als sich das mit tadingen hêr brâcht hât, schuldig sind an ainer summ geburt nun tusent vnd zwai hundert Rinscher guldin nâch der briefen lût vnd sag, so ich dann von miner herrschafft vnd inen versigelt innhab, sol menglichem ze wissent sin vnd vergich och ich vorgenanter grâf Fridrich von Toggenburg des wissentlich an disem brief, das mir die egenanten baid vogt die obgenanten summ geltz an miner herrschafft statt von Osterrich nâch minem willen vnd benugen volleklich vssgericht vnd bezalt hând. Davon so sag ich och die selben min herrschafft von Osterrich die obgenanten angulten vnd mitschuldner vnd och iro aller erben des selben geltz vnd och alle die brief, die ich inen an miner herrschafft statt geantwurt hab vnd die von allen schulden vnd sachen der egenanten summ geltz her langent, fur mich vnd all min erben ietz vnd hienâch gantzlich quitt ledig vnd lôs. War aber, das dârvber ietz oder hienâch iemer dehain brief oder vrkund von geltschuld oder ander sach wegen von mir ald minen erben wider die obgenanten min herrschafft von Osterrich die vorgenanten mitschuldner von ir wegen ald wider dehain ir erben an dehainen gerichten oder stetten vssgezogen wurdint, die vor datum dis briefs geben warint, die sollen doch all mitenander allenthalben tod krafftlôs vnd verlegen haissen vnd sin vnd mir noch minen erben enkain nutzz noch der obgenanten miner herrschafft den angulten noch irn erben enkain schad sin noch enkainen schaden bringen in dehain wyse ân gevard, doch vssgenomen pfantschafftbrief vnd lehenschafft brief, so ich von miner herrschafft innhab, vnd darzu die laistung vnd schaden nâch mins briefs sag von grâf Hugen wegen von Pfannberg¹² abzetragent, das alles sol mir vnd minen erben hierinn behalten nutzz vnd gut sin nâch der selben miner brief wysung ân gevard. Des alles ze vrkund ainer gantzen wârhait hab ich vorgenanter graf Fridrich von Toggenburg min aigen insigel fur mich vnd all min erben offenlich gehenkt an disen brief. Der ze Maygenfeld¹³ geben ward nâch Crists geburt viertzehenhundert vnd darnach im zehenden jâr an dem nachsten frytag vor sant Symons vnd Judas tag der zwelffbotten.