Ich^a Lienhart Moser burger ze Lindow¹ vnd ich Ann Wetzlin von Fussach² sin elich husfrow veriehen offenLlich fur vns vnd fur vnser erben vnd tund kunt mit disem brief allen den, die in ansehent oder||
horent lesen, daz wir beidu mit guter williger vorbetrachtung vnd ainhellenclich mit wolbedâchtem||
sinne vnd mut den erbern beschaidnen Josen Nagellin vnd Hansen Nagellin gebrudern von sant Johans von Hochst³ vnd ir baider erben ains rehten redlichen staten vngeuarlichen vnd ewigen kofs ze kouffent haben gegeben vnsern akker ze Fussach zer Rietmuli⁴ gelegen, den man nempt die Widem⁵, der obnan stost an die lantstrass vnd vndan an daz akkerli, dz wir och da haben, vnd nebentzu an die Ach⁶, mit allen gewonhaiten vnd rehten vnd mit aller zugehort vnd och fur ledig vnd fur los vnd fur vnuerkumbert, ân allain daz jarlichs dem hochwirdigen fursten dem abt vnd dem gotzhus ze sant Gallen, dannan der selb vorgenant akker lehen ist, ze zins darab gât vnd gân sol ain gantz viertal kernen zinsmess vnd nun pfening. Vnd da dannan haben wir inen och den selben akker mit aller zugehort geuertgot vnd mit lehenschaft in ir hand vnd gewalt braucht, alz vmb semliche gut vnd lehen gewonlich vnd reht ist ze vertgent. Vnd vmb den obgenanten akker mit aller zugehort hând vns die obgenanten Jos vnd Hans die Nagelli gegeben achtzehen pfunt pfening genger vnd guter Costentzer muntz, der wir gentzlich von inen gewert vnd bezalt sint vnd die och alle an vnsern redlichen vnd guten nutz komen sint. Vnd darvmb so haben wir vns verzigen vnd verzihen vns vnd vnser erben mit disem brief an dem obgenanten akker mit aller zugehort gen den obgenanten Josen vnd Hansen den Nagellin vnd gen iren erben aller aigenschaft aller lehenschaft aller gewaltsami aller vordrung vnd ansprâch vnd alles rehtz gaistlichs vnd weltlichs rehtz vnd gerihtz vnd alles vnsers rehten. Vnd also sond wir vnd vnser erben vmb den obgenanten akker mit aller zugehort vnd diss koufs, alz vorbeschaiden ist, der obgenanten Josen vnd Hansen Nagellis vnd irr erben reht vnuerschaidenlich weren sin nach dem rehten vff gaistlichem vnd vff weltlichem geriht gen allermenglich vnd an allen den stetten, wâ si des nach dem rehten ymmer bedurffent ald notturfftig werdent. Vnd ist dirre vorgeschriben kouff geschehen vnd vollefurt mit allen den worten werken vnd getaten, so von reht ald von gewonhaitt darzu gehort vnd notturftig wz. Vnd des alles ze offem vnd wârem vrkund vnd stater ewiger sicherhait geben wir fur vns vnd fur vnser erben den obgenanten Josen vnd Hansen den Nagellin vnd ir baider erben disen brief darvber geuestnot vnd besigelt mit des ersamen mans Caspar Nietstains des stammans^b ze Lindow⁷ insigel, darvnder wir vns binden vnd willenclich gebunden haben, vnd daz och er von vnser vlissiger pett wegen ze gezugnust vnd vestnung diss vorgeschriben koufs offenlich gehenkt hât an disen brief, doch im selb ân schaden. Der geben ist an dem nechsten fritag vor sant Symon vnd sant Judaz tag der hailgen zwelffbotten nach Cristus geburt viertzehen hundert jar, darnach in dem zehenden jar.