Wir^a dis nâchbenempten schuldner Lienhart von Jungingen, Hans von Bodmen baid ritter vogt ze Veltkilch vnd ze Rinegg vnd Vlrich von Amptz tund kund vnd||
veriehent menglichem offenlich mit disem brief von der laistung vnd schaden wegen, so vff grâf Fridrichen von Toggenburg geloffen wa oder gen wem das ist von grâf||
Hugen von Pfannenberg wegen, das wir vorgenanten Lienhart von Jungingen, Hans von Bodmen vnd Vlrich von Amptz geloppt vnd verhaissen hând, als hie nâch geschriben||
stât, den egenanten von Toggenburg vnd all sin erben, ob er nit war, enrihen vnd abzetragent vmb die selben gyselschafft laistung vnd schaden ân allen iro schaden hinnen ze sant Hylarien tag schierost kunfftig nâch gab dis briefs vnd den schaden, den er vnd die sinen von der selben laistung wegen sid mittervasten vntzher enpfangen hând, ân geuard. Was aber der selb von Toggenburg oder sin knecht verlaist oder die sinen schaden enpfangen hand vor der nachstvergangen mittervasten, darvmb ist im vnser herrschafft von Osterrich vnd wir nichtz gebunden. Tatint wir aber des nit, als vorgeschriben stât, wenn vns denn der obgenant von Toggenburg oder sin erben, ob er nit war, manet mit briefen oder mit botten ze hus ze hof ald vnderôgen, so sollent wir vns dann alldryg vnd iegklicher besunder darnach in den nachsten acht tagen mit zwain knechten vnd mit dryn pfariten oder ob wir selber nit laisten mochtint oder woltint, so sollent wir doch all dryg vnd iegklicher besunder an vnser iegklichs statt dryg knecht mit dryn pfariten inwendig den nachsten acht tagen nach der manung in die statt gen Maigenveld antwurten vnd da recht gyselschafft laisten ân geuard vnd davon niemer ze lâssen, all die wyl vnd als lang, vntz das der obgenant grâf Fridrich von Toggenburg vnd sin erben, ob er nit war, vmb die gyselschafft laistung vnd schaden, so darvff geloffen ist oder lôffen wurd, gar vnd gantzlich abgetragen vnd geloszt werdent. Es ist och beredt vnd gedinget worden, war ob dem vorgenanten von Toggenburg oder sinen erben, ob er nit war, nit gnug beschah, als vorgeschriben stât, so erlobent wir vorgenanten Lienhart von Jungingen, Hans von Bodmen baid ritter vnd Vlrich von Amptz dem obgenanten von Toggenburg vnd sinen erben, ob er nit war, vns vnd vnser erben vnd alles vnser lut vnd gut anzegryffent mit gericht oder ân gericht, wie inen das fugklich ist, als vil vnd als dik, vntz dz im vnd sinen erben die vorgeschriben laistung vnd aller schad vssgericht vnd abgetragen werdent, als vor geschriben stât, vnd sollent wir vorgenanten schuldner all dryg nicht dester minder laisten. Vnd also versprechent wir obgenanten schuldner Lienhart von Jungingen, Hans von Bodmen baid ritter vnd Vlrich von Amptz vnd lobent das bi den aiden, so wir hiervmb zu got vnd den hailgen gesworen habent, alles das, so von vns an disem brief geschriben stât, wâr vnd stat ze haltent vnd dawider nicht ze werben ze tun noch schaffen getân, das dem vorgenanten von Toggenburg ald sinen erben, ob er enwar, schaden oder gebresten bringen mocht in dehain wyse ân geuard. Des alles ze wârem offem vrkunde, so an disem brief geschriben stât, vester vnd gantzer sicherhait so habent wir obgenanten schuldner all dryg vnser iegklicher besunder fur sich vnd all sin erben sin insigel offenlich gehenkt an disen brief. Der ze Maigenveld geben ward des jârs, do man zalt von Crists geburt vierzehenhundert vnd im zehenden jâr, an sant Symon vnd Judas abent.