Wir^a nachgenemten Hans vnd Albreht von Haydelberg¹ gebruder tund kunt vnd verjehent offenlich mit disem brief||
allen, die in sehent oder horrent lesen, das wir baid gemainlich anhellenklich vnd wolbedaht reht vnd redlich aines||
staten jemerwerenden ewigen koffs verkoft vnd ze koffen geben hand dem erwirdigen gotzhus sant Martis² kylchen||
pflagern, wer je die sint, vnd an der selben kylchen gemainen bûw vnd nûtz vnser aygen wise gelegen ze Sitterdorf³, vnd stosset an der selben kilchen kylchofmûre, ze der obren siten gen den Staygen⁴ vnd an die lantstrasse, du man nemet Martis wise⁴ die selben wise wir och vntz her ze lehen gehept hant von dem gotzhus ze sant Gallen, wan si och lehen dannen ist. Vnd ist der koff beschahen vnd vollefurt vmb ainloff pfunt guter Costentzer pfennig, dero vns der selben kilchen pflager ze Sitterdorf wol bezalt hant vnd die von in par enpfangen hant. Dar vmb sont vnd mugent der selben kilchen pflager, wer je die sint, nû hinnenhin dieselben wise mit allen ir zugehorden vnd mit allen rehten vnd gewonhaiten, als wir die inne gehept hant, besetzen vnd verlihen, wie wem vnd warvmb si wend, das es der selben kilchen gemainen bûw vnd nutz an muren an tach an buchern vnd wa es si je notdurftig dunkt, aller notdurftigost sig, wan die wise och also mit dem almusen an der kilchen bûw vnd gebresten erkoft ist. Vnd dar vmb so hant wir vns baid fur vns vnd vnser erben der selben wise mit allen ir zugehorden an der selben kilchen bûw gantzlich enzigen vnd enzihent vns der aller lehenschaft aller aygenschaft aller besatzung vnd aller reht vordrung vnd ansprach vnd aller hilf vnd zugnust lut vnd brief vnd aller gaistlicher vnd weltlicher geriht, so wir darzu je gehept hant oder furbassen gehan mohtin, vnd hant die selben wise vor vnserm gnadigen herren abt Cun abt des gotzhus ze sant Gallen⁵ vfgeben vnd zu der selben kilchenpflagern Sitterdorf handen braht, wie dz kraft han sol vnd mag, wan wir noch vnser erben noch nieman von vnserwegen dehain gewaltsami dar zu mer nit habent, vnd hant och gelopt vnd verhaissen, vff disen koff reht wer ze sin nach lantz reht vnd gewonhat. Dez alles ze warem vnd offem vrkunt vnd gantzer sicherhat hant wir Hans vnd Albreht von Haydelberg gebruder vnsru aygnu insigel fur vns vnd vnser erben offenlich gehenkt an disen brief. Der geben ist ze Bischoffcell⁶ an der haylgen junkfrowen sant Katherinen abent in dem jar, do man zalt von Cristi geburt vierezehenhundert jar, dar nach in dem zehenden jar.