Ich^a Cunrat Esserswiler statt amman ze Arbon¹ tun kunt vnd vergich dez offenlich an disem brieff, daz fur mich kam ze Arbon in der statt, do||
ich an offem verbannen gericht saz an dem tag, alz dirre brieff geben ist, der ersam Hans Arnolt an aim tail vnd der beschaiden Herman||
Metmenegger burger ze sant Gallen an dem andren tail, vnd stalt sich der obgenant Hans Arnolt mit sinem fursprechen fur mich vnd daz gericht vnd||
offnata vnd veriach, daz er mit wolbedachtem mut lieplich vnd gutlich slechklich reht vnd redlich ains ewigen vnd staten koffs verkofft vnd ze koffen geben het fur in vnd alle sin erben vnd nachkomen dem obgenanten Herman Metmenegger den wingarten ze Obren Stainach² gelegen vnd stosset ainhalb an Haintzen Lemans wingarten mit holtz mit veld mit steg mit weg mit grund mit grat vnd mit allen rehten vnd zugehorten, der koff beschechen ist vmb zwelff phunt phenning guter Costenzer muns, dero er gantzlich von im bezalt wari vnd an sinen offnen nutz komen warint, vnd lopt och dez selben koffs fur in vnd alle sin erben reht wern ze sin jetz vnd hienach also mit solicher gedinge, waz jerrung vnd ansprachen dem obgenanten Herman Mettmenegger oder sinen erben daran jemer beschech vnd widerfuri, da solti in der obgenant Hans Arnolt vnd sin erben alwegent versprechen vnd verstan vnd vnansprachig machen gegen allermenlich vnd och gantzlich an dez obgenanten Hermans Metmeneggers vnd siner erben schaden, vnd also welti er im och den vorgeschriben wingarten vffgeben vergan vnd ze sinen handen bringen, wie reht war, vnd batt mich eruaren an ainer vrtal, wie daz beschechen solt, daz ez krafft vnd macht hetti nach dem rehten. Do ward slechklich ertailt mit gemainer vrtal, daz er im den vorgeschriben wingarten in min hand vffgeben vergan vnd senden solti by zwain tragern, die der selben lehen hettint, vnd also solti ez wol krafft vnd macht han nach dem rehten. Vnd do ze stett gab vnd vergata vnd santa der obgenant Hans Arnolt dem obgenanten Herman Metmenegger den vorgeschriben wingarten mit allen rehten vnd zugehorten vff ze sinen handen in min hand reht vnd redlich mit zwain tragern mit Lienharten Wider vnd Haintzen Leman baid burger ze Arbon vntz an ainen rehten lehen herren vnsern genadigen herren bischoff ze Costentz, dem nach so hat der obgenant Herman Metmenegger fur sich vnd sin erben dem obgenanten Hanssen Arnolt vnd allen sinen erben wider gelichen ze ainem ewigen vnd staten erblehen den vorgeschriben wingarten mit aller zugehort also vnd mit solicher gedinge, daz er im vnd allen sinen erben aller jarlich vnd jeklichs jars besunder ze herbst vnd ze Stainach vss dem vorgeschriben wingarten vnder der rennen richten vnd geben sont ainen som wins vngeuarlich, war aber, daz dehains jars so vil wins in dem vorgeschriben wingarten dehains jars nut wurde, so solti der obgenant Hans Arnolt vnd sin erben vnd nachkomen dem obgenanten Herman Metmenegger vnd sinen erben ain phunt phenning guter Costenzer muns vnd werung dez selben jares je vff sant Gallen tag vnverzogenlich richten geben vnd antwurten ze sant Gallen in der statt zu ira handen vngeuarlich. Tati der obgenant Hans Arnolt oder sin erben dez nut, wie denne darnach der obgenant Herman Metmenger^b oder sin erben dez gevalnen zins ze schaden kamint, ez sige vom win oder von der phenning wegen, von dem selben schaden solti in der obgenant Hans Arnolt vnd sin erben gantzlich losen vnd ledig machen in vnd sin erben vnd sont och darumb gewalt han, den vorgeschriben wingarten mit aller zugehort angriffen hin geben vnd verkoffen ze drien tages vss alz ain varndez phand vnd sich selber da von hoptgut vnd zins vnd allez schaden losen vnd ledig machen, vnd solti sy daran nieman jerren noch sumen weder mit gaistlichem noch mit weltlichem gericht noch mit dehainen sachen. Vnd do diz allez beschach vnd volffurt ward vor mir vnd dem gericht, do fragt ich obgenanter amman vmb, do wart ertalt, dez beschechen wari, daz ez krafft vnd macht hetti nach dem rehten jetz vnd hienach. Vnd dez allez ze warem offnem vrkunt so han ich der obgenant Cunrat Esserswiler statt amman ze Arbon von dez gerichtez wegen, won ez vor mir mit gemainer vrtal ertailt ist, daz ich ez tun solti, min aigen insigel gehenkt han an disen brieff mir vnd minen erben vnschedlich. Ich der obgenant Hans Arnolt vergich ainer gantzen warhait allez dez, so hie vor von mir geschriben stat, vnd ze merer sicherhait so han ich och min aigen insigel fur mich vnd alle min erben gehenkt an disen brieff. Der geben ist ze Arbon in der statt an sant Katherinen abent in dem jar, do man zalt von Cristus geburt vierzechen hundert jar, darnach in dem zechenden jare.