Wir^a graf Friderich von Toggenburg¹ herr in Pretigôw² vnd in Tauas³ tund kunt vnd vergehint offenlich mit disem brief, das fur vns komen ist an disem tag, als diser brief||
geben ist, vnser lieber getruwer Albrecht Kyrcher der elter von Costentz vnd offnot vor vns, wie das er vnd die erber frow Ann salig von Schafhusen⁴ Lowen Schwartzen elichi frow von||
vns in rechter gemaindwys ze lehen habind die vogty uber den hof ze Obra Buwille⁵ gelegen, der da ist der herren vnd des gotzhus ze sant Johans in dem Thurtal⁶ vnd die jarlichs||
giltet ze vogrecht sechzehen schilling guter pfenning Costentzer muntz vnd vier nachtzell jarlichs mit knechten vnd mit pfariten oder aber fur die vier nachtzell vier schilling pfenning Costentzer muntz, wedres dann ain vogt wil, jeglichs jars vnd zwai vastnacht hunr. Vnd won die selb frow Ann von todes wegen abgangen war vnd die selb vogty an in geuallen war, do batt vns der selb Albrecht Kilcher demûtklich, das wir im vnd sinen elichen kinden, si sigind knaben oder tochtran, die selben vogty mit zins vnd mit allem rechten vnd zu gehorden lihen weltend. Der bêtt wir in erhort habind vnd habind die selben vogty gelihen mit iren zu gehorden dem selben Albrechten Kilcher vnd sinen elichen kinden knaben vnd tochtran ze rechtem lehen vnd habend ouch dis lehenschaft gen im getan mit aller kraft, so darzu hort vnd notdurftig was, doch also das nach des selben Albrechtz tod vnd abgang je der eltest sun das selb lehen von vns oder vnsern erben enpfahen sol, war aber, das nit knaben warind vnd das das selb lehen an tochtran viel, die sollend das selb lehen ouch dann von vns enpfahen vnd vns ouch dann ainen trager darzu gebind nach lehens recht. Vnd des alles ze warem vnd offem vrkund dirre ding gebind wir obgenanter graf Fridrich von Toggenburg vnser insigel an disen brief. Der geben ist, do man von Cristi geburt zalt vierzehenhundert jar vnd zehen jar, an dem nachsten mantag vor sant Niclaus tag.