Ich^a Johans Koch schultheisz ze Vtznach¹ vergich vnd tun kund offenlich mit vrkund disz briefs allen den, die in an sehent oder horent lesen, dz der frôm Arni Schnelman burger||
ze Vtznach da selbs ze Vtznach in der statt vor mir offnut vnd an mich brâcht mit verdachtem mut vnd gutes willen, wie er in Hanses Mullers von Roszhôpt² gutern hett zwei ewigy||
stuk gelts vnd ein pfandstuky gelts und in der Walinen von Kalprunnen³ gutern funf vnd drisig schilling pfenning gelts, die stundint drisig guldin vnd drie guldin, die selben stuky||
gelts vnd dar nach elly die pfand stuky gelts, die er hett, wie die geheissen oder genempt warint ald wo die gelegen warint in der March⁴ ze Wagy⁵ oder anderswa ennent dem se oder sy legint disent dem se, wo man die erfragen kond, die wolt er gantzlich nach eigenschaft geben an des heiligen crutzes altar, der gelegen ist ze Vtznach in der lutkilchen, also mit dem geding vnd bescheidenheit, dz die selben vorgenanten stuky gelts elly Margaretan sines elichen wips libding sin sond vnd die ze end ir wil innie haben vnd niessen sol in libdings wis, wary dz sy inn vber lepti vnd nach sinem tod sich nut verenderty mit einem andern man ze nemen, vnd nach ir tod sond sy elly denn gantzlich fallen an den obgenanten altâr vnd nut e, sy verender sich denn mit einem andern man nach sinem tod, so soltint sy aber denn ze stund gefallen sin an den vorgenanten altâr, war ôch dz der obgenant Arni Schnelman die vorgenant Margaretan sin elich wip vber lepty, so soltint die vorgenanten stuky gelts elly ôch sin libding sin vnd nach sinem tod ôch fallen an den vorgenanten altâr, also ob er sy ersparen mocht vnd sy nut von siner not wegen verkoffen must, vnd ôch vb er an lib erben abgieng, war aber dz er lib erben gewunny by der vorgenanten Margaretan sinem elichen wip oder by einer andren sine(m) elichen wip nach ir tod vnd die selben lib erben den obgenanten Arnin Schnelman vber leptint, so soltint die vorgenanten stuky gelts an die selben lib erben fallen vnd solt denn das geben dem heiligen crutz gantzlich ab sin, die lib erben woltint denn dz gern nach ir vatter tod dar an geben. War ôch, dz die vorgenanten stuky gelts gefielint an den vorgenanten altâr nach dem, als vor bescheiden vnd berett ist, so solt ein capplân des vorgenanten altârs des heiligen cruces oder ein pfleger des selben altârs einem lupriester der obgenant lutkilchen ze Vtznach vss vnd von den vorgeseiten stukinen gelts dru viertel kernen iarlich geben Vtznacher messes, das er des obgescribnen Arnis Schnelmans vnd Margaretan sines erren wips vnd der vorgenanten Margaretan sines nach genden wips vnd siner vordren vnd siner nach komen ewanklich gedenken solt all sunentag an der cantzel vnd ir drierr iartzit begân solt an ir iarlichen tagen. War ôch, das ieman der vorgenanten pfand stuky deheines ablôsty, so soltint denn der obgenant Arni Schnelman vnd Margareta sin elich wip ald ir eines, weles denn in lib wary, das selb gelt mit rât eines capplâns des vorgenanten heiligen crutz altârs ald mit eines pflegers des selben altârs rât an legen vnd bewenden an andru gut, die denn nach ir beider tod fielint an den obgenanten altâr mit dem geding vnd bescheidenheit, als vor gerett ist vnd gescriben stât. Vnd batt mich dô der dikgenant Arni Schnelman, die obgenanten stuky gelts elly also von im vff nemen an min hand und sy lihen vnd geben Margaretan sinem elichen wip ze einem rechten libding vnd die eigenschaft der vorgenanten stukinen gelts lihen vnd geben einem pfleger des obgescribnen altârs ze des selben altârs handen vnd an siner statt, doch mit denen gedingen, als vorgescriben stât. Do erhort ich sin ernstlichen batt vnd nam die vorgenanten stuky gelts elly von im vf an min hand vnd lech und gab die do der obgeseiten Margaretan sinem elichen wip vnd gib sy ir ôch wissentlich mit vrkund disz briefs ze irem rechten libding, also das sy die selben stuky gelts ze end ir wil inne haben vnd niessen sol nach libdings recht mit den gedingen, als vorgescriben stât. Dar nach lech vnd gab ich die eigenschaft der vorgenanten stukinen gelts aller Chunraten Held burger ze Vtznach, der do ze mal pfleger was des obgenanten altârs des heiligen cruces, in des selben heiligen cruces namen vnd statt, also das die vorgenanten stuky gelts elly nach des obgenanten Arnis Schnelmans tod vnd nach Margaretan sines elichen wips tod fallen sond an den obgenanten des heiligen cruces altâr, vnd ôch mit den gedingen, als vor berett vnd bescheiden ist, ân alle geuerd. Vnd des ze vrkund vnd ze merer sicherheit aller vorgscribnerr ding vnd geding so han ich Johans Koch schultheisz ze Vtznach da vorgenant min insigel des vorgenanten lihens vnd gebes wegen vnd von ernstlicher batt wegen des obgenanten Arnis Schnelmans offenlich mir vnd minen erben vnschadlich gehenket an disen brief. Der geben ward am nechsten dunstag nach sant Andres tag des zwelfbotten in dem jar, do man zalt von Cristy geburt viertzehen hundert jar vnd dar nach in dem zehenden jâr. Hie by sint gesin herr Hans Bollinger vnd herr Vlrich Schubinger beid priester vnd Heinrich Schubinger, Hans Irnimer, Heinrich Schmid all drie burger ze Vtznach vnd ander erber lut vil.