Ich^a Eberhart von Sax¹ tun kund allermenklich vnd vergich offenlich mit disem brief, als der edel wolerboren herr||
graff Fridrich von Toggenburg² ainen staten guten schlechten getruwen frid berett betadinget vnd gemachot hat||
zwischent mir ze ainem tail vnd zwischent den fromen wolbeschaidenen dem landamman vnd gemainen landluten||
ze Appentzell³ vnd mit gemainer statt ze Altstetten⁴ ze dem andren tail von hut dem tag hin, als der brief geben ist, funf jar gentzlich vs die nachsten, so schierost nach enander koment nach dat dis briefs, mit denen gedingen, als hie nach geschriben stat. Item des ersten sol^b sol ich noch min erben, ob ich nit wer, wider die vorgenanten den landamman vnd gemain landlut ze Appentzell vnd gemain statt ze Altstetten vnd alle, die zu inen gehorent oder die noch hinnenthin zu inen gehoren werdent, nit wider sy sin sol^c mit minen vestinen Sax vnd Vorstegg⁵ landen vnd luten, die ich ietz han oder die ich oder min erben noch hinnenthin gewinnent, vnd sol ouch vss den vorgenanten vestinan sy in kain wis noch weg dar vs noch dar in nit lassen bekumbren angriffen noch schadgen die nachsten vorgeschribnen funf iar vs, als vorgeschriben stat, an geuerde. Och ist berett, als die Hoch Sax min pfand ist von miner herschaft von Osterich, wer da, dz die selb min herschaft von Osterich die selben vesti die Hohen Sax von mir oder von minen erben in den vorgenanten funf jaren losti, dz sollent wir den vorgenanten dem landamman vnd gemainen landluten ze Appentzell vnd gemainer statt ze Altstetten vor allem schaden kund vnd ze wissen tun an geuerde, vnd sol dennocht der frid bestan vnd gantz beliben die vorgenanten funf jar gentzlich vs an geuerde. Vnd als denne Cuni Riner, Welti Klok, Wilhelm Lur vnd Hans Vlis sun imm Hag⁶ von mir entwichen vnd vsschichtig worden sint, die mugent ouch by dem vorgenanten satz vnd frid beliben, ob sy wellent, vnd ist denne, daz sy vff dem iren beliben wellent, so sol ich oder min erben sy halten vnd schirmen getrulich als ander die vnsern, woltin sy aber vff dem iren selber nit sin vnd daz sy die guter sust besetzen woltin, so sollent sy mir oder minen erben die verzinsen vnd versturen als ander vnser aigen lut an alle geuerde. Wer ouch, daz dehainer der minen by disem satz vnd frid nit beliben wolt vnd das ich oder min erben den des nit gewisen mochtin, wan das er wider den obgenanten landamman vnd landlut ze Appentzell vnd gemain statt ze Altstetten tat, des selben oder der selben lib vnd gut sol inen erlobt sin anzegriffen, vnd sol ich noch min erben noch nieman von vnser wegen sich des nutz an nemen klain noch gross vnd ouch nut darzu tun an alle geverde. Vnd sol dennocht der vorgenant satz vnd frid bestan vnd gantz beliben vnd getrulich gehalten werden die vorgenanten funf jar gentzlich vs an alle geuerde. Wer ouch, dz es sich fugti oder zugieng, das ich oder die minen, sy sigin min aigen min vogtlut min lehen oder min pfand, mit dem vorgenanten landamman vnd gemainen landluten ze Appentzell vnd mit gemainer statt ze Altstetten vnd die zu inen gehorent ze schaffen hettin oder gewunnin, so sollent wir vns rechtes von inen lassen benugen an den stetten vnd in den gerichten, das sy in gehorent vnd gesessen sint, es wer denne, das ainer rechtlos gelassen wurd, der mocht denne wol furbasser daz recht anderschwa suchen, so es sich erfund, dz er rechtloss gelassen wer, an geuerde, vnd sol dennocht der vorgenant frid bestan die vorgenanten jarzal gar vs an geuerde. Vnd des alles ze ainer gantzen waren stater sicherhait aller vorgeschribener stuk vnd geding so han ich obgenanter Eberhart von Sax by miner truwe in aides wis fur mich vnd alle min erben gelopt vnd verhaissen, ellu vorgeschribeni stuk getrulich ze halten an alle geuerde. Vnd des alles ze warhait so han ich min insigel fur mich vnd min erben offenlich gehenket an disen brief. Der geben ist an sant Niclas abent nach Cristus geburt vierzehenhundert jar vnd dar nach in dem zehenden jar.