Wir^a Cun von gotz gnaden abt des gotzhus ze sant Gallen¹, das an alles mittel zu gehort dem stul ze Rom,||
tund kund vnd ze wissenn manglichem mit disem offnen brief, das vff hutt den tag, als dirre brief geben ist, ze||
sant Gallen vff vnserm hus fur vns kament die erberen lut Hans Klain von Waltkilch² mit Elsen siner elichen frowen wiLlunt Hans Osterwalds elichi tohter, vnd offnat der selb Hans Klain vor vns, wie er die selben Elsen sin elichen^b ze rehtem gemainder vnd erbgenossen an nemen wolt vber sin hus hofstatt vnd garten ze Waltkilch gelegen, stoss ze baider sit an die lantstrass vnd an der von Ramswag³ guter, vnd och vber alles ander gelegen vnd varent gut, das er ietz hab oder hienach gewunn in kunftigen ziten, mit der beschaidenhaid vnd gedinge, war das si baidu elich liberben bi enandern gewinnent vnd in wurdent, das denn die egenempt Els sin elich frow mit iro elichen liberben sol stan ze gelichem tail an ligenden vnd varendem gut vnd sich da sol lassen kinds tail benugen vnd nit furo ansprach darzu haben nach des selben ir vorgenanten elichen mans tode. Vnd also batt vns der vorgenant Hans Klain, won er zu vnserm vorgenanten gotzhus gehorti vnd das vorgenant hus hofstat vnd garten ain hoff gutt^c von vnserm vorgenanten gotzhus sin lehen wari, das wir im des gundin vnd vnsern willen darzu gabint. Darvmb erhortand wir do sin bett vnd gabent vnsern willen vnd gunst darzu. Also gab do der egenempt Hans Klain vor vns offenlich vff an vnser hand das vorgenant hus hofstat vnd garten mit siner zu gehord vnd batt vns das ze lihenn im vnd der selben Elsen siner elichen frowen gemainlich ze lehen, nam sy och do ze mal, wie reht was, ze rehtem gemainder vber das vorgenant hus hofstatt vnd garten mit iro zu gehorde vnd vber alles ander gelegen vnd varent gut, das^d ietz hat oder noch gewinnet, mit der beschaidenhait, beschah das den^e egenempten Hansen Klainen vnd Elsen siner elichen frowen elich liberben bi enandern wurdint, das denn die selb Els ze gelichem kindes tail soll stan vnd sich des von ligendem vnd varendem gut lassen benugen nach des selben Hansen ir elichen mannes tod vnd furo dehain ansprach me darzu noch darin han ze sprechen in dehain weg an alle geuard. Vnd ist dis beschehen, als es crafft vnd maht haben sol vnd mag ietz vnd hie nach, doch vns vnsern nachkomen vnd vnserm vorgenanten gotzhus an allen vnsern rehten nutzen vnd gewonhaiten vnd andren dingen gantzlich vnschadlich vnd vnuergriffenlich. Vrkund der warhait henkent wir vnser abtye insigel offenlich an disen brief. Darnach vergih ich Hans Klain ze Waltkilch sesshafft ain gantz warhait aller vorgeschribner dinge, vnd ze merer sicherhait dirre vorgenanter ding vnd vergiht^f han ich erbetten den wisen Vlrichen Binggisser burger ze sant Gallen, das er fur mich vnd alle min erben sin aigen insigel im vnd allen sinen erben ietz vnd hie nach vnschadlich offenlich gehenkt hat an disen brief. Geben am samstag nach sant Barbaren tag der haligen jungfrowen nach Cristi geburt vierzehenhundert jar, darnach in dem zehenden jar.