Wir^a graf Hug von Werdenberg zu disen ziten landvogt in Swaben¹ tun kund allen den, die disen brief an sehend oder horend lesen, das wir mit den fromen beschaidnen dem lantamman||
vnd gemainen lantluten ze Appencell² ainer fruntlicher ainung vberain komen sind mit den artikeln und puntnuss, als hie nach geschriben ist, von ir getruwen dienst vnd fruntschaft, so||
si vns getan hand von des Rintals wegen vnd in andren sachen vnd noch furbas wol getun mûgint in kunftigen ziten. Item hier vmb so hant wir vns geben gen dem Rintal vnd den von Altstetten³||
vnd die iren, das wir si wellind vnd sollind lasen beliben bi allen iren rechten vnd frighaiten, die si hant von kungen vnd kaisern vnd von andren herren. Item och sond sy enkain pfand niemer werden noch sin gen niemen, also das wir si niemer versetzen noch verandren sond in dehain wis noch in der herrschaft hend noch in ander fromd hend bringen noch gen wider die obgenanten von Appencell vnd das Rintal. Item och hand wir den obgenanten von Altstetten vnd dem Rintal da selbs gunnen vnd in besunder gnad getan, das si sweren mugend vnd sond von des gotzhus wegen zu den obgenanten von Appencell ewenklichen, also das si ze baiden tailen anandren beraten vnd beholfen sin sond, wer si trengen wolt ain ir lib vnd gut. Item och sollend wir vnd wellend den obgenanten von Altstetten vnd dem Rintal schirm vnd hilf gen in allen sachen vngefarlichen, als ain herr billichen sinen luten tun sol zem rechten. Item hier vmb so sond die obgenanten von Altstetten vnd das Rintal vns hulden vnd sweren vnd vns gehorsam sin mit nutzen vnd diensten vngefarlichen, als si denn von ainem rich versetzet sind, vs genomen als fer wir des gewalt hand von ainem rich, des gunnend wir inen och, als fer wir gewalt hand ze gunnen. Item es ist och berett vnd tadiget worden, das vnser genadiger herr graf Hug von Werdenberg noch niemen von sinen wegen die statt ze Altstetten besetzen sol wider die von Appencell, won das si bi vnsern vnd bi iren handen beliben sollend, vngefarlich. Item war och, das vnser genadiger herr graf Hug von Werdenberg abgieng von todes wegen, davor got syg, so sol die statt ze Altstetten vnd das Rintal bi den selben aiden beliben, als si denn swerent zu den von Appencell, es war denn, das sin erben sich halten woltend in aller der wis vnd mas, als er tan het, mit allen dingen vnd sachen gegen denen von Appencell vnd inen. Hier vmb so hand wir den obgenanten von Altstetten vnd dem Rintal vnser besunder gutlichi vnd genad getan, das wir enkain schatzung niemer me vff sy legen wend noch sond. Item war och, das wir obgenanter herr graf Hug enkain vbergriff tun woltind gen den vorgedachten von Altstetten vnd dem Rintal oder jemen besunder da selbs wider die gnad vnd frighait, so wir inen gunnen hand, als dir brief wiset, das sol gantzlich bestan vff ainem rat ze Appencell oder ain gemainen lantluten da selbs, vnd wie vns die darvmb enschaiden, da bi sol es beliben. Item war och, das man die obgenanten von Appencell oder die von Altstetten vnd das Rintal trengen vnd vf triben wolt mit gerichten, weler laig das gericht war, von der zuspruchen vnd sachen wegen, als das Rintal zu vnsern handen ist komen mit disen artikeln, als dir brief wiset vnd sait, da sollend vnd wellend wir si inn versprechen vnd verstan mit dem rechten, als fer wir mugind vngefarlichen. War och, das ieman, wer der war, nieman vs gelasen, gewalt ain si legen wolt vnd si bekriegen an recht von der obgenanten zuspruch vnd sachen, da sollend vnd wellend wir in hilflich sin mit andern vnsern landen vnd luten vnd stetten vnd vestinen, die wir denn hand, als fer wir mugind, vngefarlich, vnd vns in den selben kriegen niemer von in sunderen mit friden vnd richtigen, denn das wir si vsser den kriegen mit vns ziehen wend vnd sond vnd mit ir wissen vnd willen. Och hant wir den obgenanten von Appencell von iren truwen vnd fruntschaft wegen, so si vns getan hand vnd noch furbas wol tun mûgend, die gutlichi vnd genad getan, das wir niemer wider si noch nieman den iren sin wend von jemans wegen weder vmb silber noch vmb gold noch vmb enchain gut noch von vns selber wegen mit allen vnsern landen vnd luten stetten vnd festinen, wir habind si ietz inn oder si werdent vns noch in kunftigen ziten, vnd in da durch kof gen, als dik si des notdurftig sind, vnd in des nut for sin vngeferlich. Och sollend wir vnd wellend vnd die vnsern der obgenanten von Appencell ir lib vnd gut durch all vnser land vnd stett, wir habind si ietz oder si werdent vns noch in kunftigen ziten, nut lasen furen triben noch tragen, wer si also bekriegen vnd aingriffen vnd bekummeren wolt, vnd das also wenden vnd weren vnd vf halten zu dem rechten, als fer wir kunnind oder mûgind vngefarlich. War och, das ieman deren von Appencell in dem Rintal vtz ze sprechen hett oder jeman vsser dem Rintal zu enchainen von Appencell, da sol ieder man von dem ander das recht nemen ain den stetten vnd in den gerichten, da denn der ainspraching gesessen ist vnd hin gehort. Item war och, das gemain lant ze Altstetten vnd in dem Rintal stos vnd zuspruch gewunnent gen gemeinem lant ze Appencell oder die selben lantlut gemainlich zuspruch vnd stos gewunnint gen gemainem lant ze Altstetten vnd in dem Rintal, des sollend si ze baiden tailen komen vff ainen rat ze sant Gallen oder Zurich. Item die gnad vnd frighait, so hie vorgeschriben stat, die habind wir getan den von Altstetten vnd den von Marpach⁴ vnd den andern in dem Rintal, die zu disen ziten nach datum dis briefs zu den von Appencell verbunden sind gewesen. Vnd des ze offemm warer vrkund vnd stater ewiger sicherhait aller dir vorgeschribner ding vnd vergicht so hant wir obgenanter graf Hug vnser aigen insigel offenlich gehenkt ain disen brief. Der geben ist vff Rosenberg⁵ der festi am nachsten dûnstag nach sant Nycolaus tag, do man zalt von gottes geburt fierzehenhundert iar vnd dar nach in dem zehenden jar.