Ich^a Iohans von Ainwile¹ bekenn vnd vergich offenlich mit disem brief allen den, die in ansehent lesent oder horent lesen, das fur mich kam ze sant Gallen in der statt vff disen huttigen tag, als||
dirre brief ist geben, der erber kneht Iohans Lasser ab dem Rotmônten² vnd offnot vor mir, wie das er von mir ze lehen hetti ain gut gelegen vff dem Rotmônten, das ainhalb stiessi||
an die kilchen andrunthalb an des Furers gut, das man nemet Loch³, vnd ze der dritten sidten an des Varnbulers gut, das man nemet das Tan⁴, ab vnd vsser dem selben gut vnd||
was darin vnd darzu gehorti, hetti er mit guter vorbetrahtunge vnd mit wolbedahtem mute von siner redlicher not wegen ain malter guter vngeuarlicher vesan sant Galler messes ewigs geltz vnd jarlichs zins aines staten ewigen iemerwerenden kôffes redlich vnd reht verkôffet vnd ze kôffent geben dem ersamen Iohansen dem Landen burger ze sant Gallen vnd sinen erben, ob er enwar, vmb sehs pfunt guter Costentzer pfenning, vnd war ôch dero nach allem sinem willen von im vsgeriht vnd gar vnd gantzlich bezalt worden vnd hett die in sinen offenn nutzz bewendet an den stetten, da er sinen wachssenden schaden mit hett verkomen. Das selbe malter vesan ewigs geltz vnd jarlichs zins wolt er im vfgeben vertgen vnd zu sinen handen bringen, vnd bat mich gar ernstlich, das ich es von im vfname vnd es dem selben Iohansen Landen ze lehen lihe in der wise, als hienach verschriben stât. Das wari also, das er vnd alle sin erben vnd nachkomen, in dero hand vnd gewalt das vorgeschriben gut iemer kame ald das inne hettint ald nussint, soltint dem vorgenanten Iohansen Landen sinen erben ald nachkomen vff den nachsten sant Martis tag kunftig nach datum dis briefs vnd dannenhin allerjarlich vnd ewklich ân vnderlâss ie ze sant Martis tag ân alle abgeng vszug vnd widerred vnd ân allen iren schaden ab vnd vsser dem vorgeschriben gut mit aller zugehorde ze rehtem jarlichem zins geben rihten vnd antwurten ze sant Gallen in der statt ain malter vesan gutes vnd vngeuarliches kornes des vorgeschriben messes, vnd welhes jares dz nit geschahi, so hetti der vorgenant Iohans Land vnd sin erben vnd nachkomen vnd dero helffer, wer die warint, vollen gewalt vnd fryes vrlob, ie nach sant Martis tag, wenn sy woltint, in vnd sin erben vnd nachkomen ze notent ze heftent ze pfendent vnd anzegriffent vff dem selben gut vnd anderswa an allen iren ligenden vnd varenden gutern in stetten in dorffern vff dem lande vnd allenthalb mit gaistlichem vnd weltlichem geriht vnd ân geriht ân zorn vnd ân klag, wenn wa vnd wohin sy das getun mohtint vnd inen fugklich war, als vil vnd als lang, vntz das sy des selben zins, der inen dennocht da von vssgestanden vnd nit worden war, vnd da mit alles des schaden, in den sy vnd iro helffer von des selben notentz heftentz pfendentz vnd angriffentz wegen komen warint, vsgeriht vnd vollenklich ân iro schaden bezalt wurdint, vnd dauor solt sy noch kain iro ligent noch varent gut niht schirmen noch gut sin kain burgreht lantreht fryhait gesetzt weder gaistlich noch weltlich geriht noch kain andru sach fund noch vszug, die ietz ald in kunftigen ziten ieman erdenken kond ald moht. Vnd ob sich das als lang verzug, das inen der vorgeschriben zins nit vsgeriht vnd gantzlich bezalt wurd vnd ain zins den andern erluff, so solti dem vorgenanten Iohansen Landen sinen erben vnd nachkomen das vorgeschriben gut mit aller zugehorde zinsvellig vnd fur reht aigen vervallen sin, vnd mohtint das dannenhin versetzen verkôffen besetzen entsetzen vnd da mit werben vnd tun als mit anderm irem aigen gut, vnd daran solti er noch sin erben noch nachkomen noch nieman von iro wegen sy nit sumen ierren trengen noch in kain wis bekumberren weder mit geriht noch ân reht mit worten noch mit^b werken noch mit dehainen andren sachen ân alle geuerde. Vnd also erhort ich des obgenanten Iohansen Lassers flissig bett vnd nam das obgeschriben ain malter vesan ewigs geltz ab vnd von dem vorgedahten gut von im vff an min hand vnd leh es do ze stund vnd lih mit aller zugehorde in kraft dis briefs dem vorgenanten Iohansen Landen ze lehen in allen den rehten vnd bedingden, als vorgeschriben stât, doch mir vnd minen erben vnd nachkomen ân allen vnsren rehten vnd nutzzen gantzlich ân schaden. Vnd darnach verzeh sich der vorgenant Iohans Lasser des vorgeschriben ainen malter vesan geltz ab vnd von dem vorgeschriben gut mit aller zugehorde aller aigenschaft aller lehenschaft aller kuntschaft aller zugnust vnd gewer lut vnd brief aller vordrung vnd ansprachen aller reht vnd rehtung, so er ald sin erben vntz her vff disen huttigen tag, als dirre brief ist geben, ie gehebt hant ald noch hinnenhin iemer gehaben oder gewinnen mohtint, vnd lôpt ôch da by, daz er noch sin erben noch nieman an iro statt noch von iro wegen den obgenanten Iohansen Landen noch sin erben noch nachkomen darvmb nit furbaz sollent noch wellent ansprechen vftriben noch in kain wis beswarren weder mit gaistlichem noch weltlichem geriht noch ân reht noch mit kainen andren sachen ân geuerde. Er lôpt furbz fur sich vnd sin erben, des vorgenanten ainen malter vesan geltz mit aller zugehorde vnd des kôffes reht weren ze sind nach landes reht vnd den vorgenanten Iohansen Landen vnd sin erben darvmb ze versprechen vnd ze verstand an allen stetten gen allermenglich, als vil vnd dik sy darvmb angesprochen werdent mit dem rehten. Vnd des alles ze offemm wârem vrkund so han ich Iohans von Ainwille da vorgenant min insigel von dirre lehenschaft wegen an disen brief gehenkt. So vergich ich der vorgenant Iohans Lasser ain gantz warhait aller der dinge, so von mir an disem brief verschriben stând, vnd ze merer sicherhait der selben dinge vnd vergicht so han ich erbetten, won ich nit aigens insigels han, den erbern Hainrichen Krumben den alten burger ze sant Gallen, das er sin insigel fur mich vnd min erben vnd nachkomen an disen brief gehenkt hat im vnd sinen erben vnschadlich. Geben an sant Lucien tag in dem jare, do man zalt von Cristus geburt vierzehenhundert jar, darnach in dem zehenden jare.