Ich^a Vrssula Bokkin Hansen Lupfensaks salgen elichu wittwe burgerin ze Veltkirch¹ vergich vnd tun kund allermengLlichem mit disem offenn brief, das ich mit guter williger vorbetrachtung ze den zyten vnd tagen, do ich es||
mit dem rechten fur mich vnd allu minu kind, dero brief vnd gewalt ich dafur hab, vnd och fur all vnser||
erben wol kreffteklich getun mocht, mit Johansen Littschers des stattammans hand ze Veltkirch² vnd ouch sunderlich nâch rât vnd mit gutem willen vnd gunst mins rechten erkornen vogtz Hansen Gramlichs ains burgers daselbs ze Veltkirch recht vnd redlich ze kôffent geben hab ains bestaten vngevârlichen ewigen kôffs vnd ouch fur recht ledig vnuerkumbert aigen gut dem erwirdigen minem gnadigen lieben herren abbt Albrechten vnd dem couent gemainlich des gotzhuses ze sant Johann im Thurtal³ in Costentzer bistum gelegen vnd iren nâchkomenn vnd ôch nammlich dem selben gotzhus sant Benedicten ordens min vnd miner egenanten kind aigenn halbtail vnd nammlich allu vnsru recht, so wir hând an dem zehenden mitenander grossem vnd klainem jungem vnd altem, wie das nammen hât, nichtz vssgenomen, von dem hof mit siner zugehord genant ze Môs⁴ in Getzner⁵ kilchspel gelegen, da der ander halbtail des selben zehenden Jaken Tomans salgen erben zugehoret, mit allen sinen rechten nutzzen fruchten guten gewonhaiten ehafftinen vnd zugehorden benempten vnd vnbenempten vmb siben pfund alles guter genamer pfenning Costentzer munss, dero ich von her Vlrichen dem Kriechen couentherren ze sant Johann, der och disen kôff getân hât, an barem gelt gantzlich gewert vnd bezalt bin, mit dem geding, das ich vnd minu kind vnd och all vnser erben vnuerschaidenlich des ewigen redlichen kôffs vnd nammlich aller hievorgeschribner ding vmb den egenanten vnsern aigenn halbtail des zehenden mit siner zugehord ze Mos, als vor ist beschaiden, iro vnd iro nâchkomen vnd ôch nammlich des obgenanten gotzhuses gut vnd getruw wern vnd gewern sin sond nâch recht vnd ân iren schaden, wâ vnd gegen wem su des an gaistlichem vnd an weltlichem gericht ald an andren stetten iemer bedurffent ald notdurfftig werdent, mit guten truwen ân all widerred vnd gevard. Vnd des alles ze warem offem vrkunde vnd stater fester sicherhait nv vnd hienach so hab ich inen vnd iren nâchkomenn vnd och dem obgenanten gotzhus disen brief hiervber ernstlich gebetten besigeln mit der egenanten Hansen Littschers vnd Hansen Gramlichs mins vogtz insigeln, darvnder ich minu kind vnd all vnser erben willeklich vnd festeklich verbunden hab vnd bind des obgedâchten mins ewigen verkôffens vnd nammlich aller hievorgeschribner ding. Des veriehent wir dieselben Hans Littscher stattamman vnd Hans Gramlich ir vogt, das wir vnsru insigel also durch der egenanten Vrssulen Bokkinen ernstlicher vergicht vnd bett willen ze vrkund des kôffs, den si mit vnsern handen mit vnserm guten willen vnd gunst vnd och mit allen andern sachen worten vnd werkken getân vnd vollfurt hât, das es ze recht wol krafft vnd macht haben vnd fest vnd stat belyben sol nv vnd hienach in der wyse, als vor ist beschaiden, doch vns vnd vnsern erben vnschadlich gehenkt habint an disen brief. Der ze Veltkirch geben ward an zinstag vor vnser frowen tag zer liechtmiss nâch Crists geburt viertzehenhundert vnd darnach im ainlufften jâr.