Wir^a Cun von gotz gnaden abt des gotzhus ze sant Gallen¹, das an alles mittel zu gehort dem stul ze Rom,||
tund kund vnd veriehent offenlich mit disem brief manglichem, das fur vns kam ze sant Gallen vff vnserm hus||
der wis vnd wolbeschaiden Niggel Rupreht burger ze Lindow² vnd zogt vns brief versigelt von dem vesten Hainrichen||
von Schellenberg³, an dem selben brief vns der selb Hainrich verschraib, wie dz er dem vesten Hainrichen Vogt vom Lupoltz⁴ vnd sinen erben fur sich vnd alle sin erben ze koffenn geben hetti die vesti Brahsperg⁵, die burgsass ist von dem vorgenanten vnserm gotzhus ze sant Gallen, mit den gutern vnd nutzzen, die zu dem burgsass gehorrent, vnd ander nutz zins rehtungan vnd guter, die darzu kofft sint vnd begriffen sint in dem koff brief, der darvber geben ist, verschriben stand, vnd sandt vns mit dem selben sinem brief ledklich vff an vnser hand fur sich vnd sin erben vnd batt vns ernstlich, dz wir die vesti vorgenant Brahsperg mit den gutern, die zu dem burgsass gehorrent, vnd och ander nutz zins reht vnd gewonhait vnd guter, die darzu kofft sint, als die in dem vorgenanten koff brief verschriben stand, lihint dem egenanten Hainrichen Vogt vom Lupoltz, die vesti ze burgsass mit den gutern, so zu dem burgsass gehorrent, vnd das ander alles ze rehtem lehen lihint. Och zogt vns der vorgenant Niggel Rupreht von dem vesten Walthern von Kungsegg⁶ ainen offnen versigelten brief, mit dem selben brief er vns vff sandt die vorgenant vesti Brahsperg mit allen gutern zinsen nutzzen vnd rehten vnd gewonhaiten ledklich vff an vnser hand, vnd batt vns, das och ze lihenn dem vorgenanten Hainrichen Vogt vom Lupoltz, won och das Hainrich von Schellenberg im mit sinem willen vnd gunst vnd verhengde ze koffenn geben hetti, die vesti ze burgsass vnd lehen ze lehen. Darvmb erhortant wir do iro bett vnd sahent an, das baid tail von redlicher sach wegen fur vns ze disen ziten nit komen mohtant, vnd darvmb so lihen vnd sendent wir mit vrkund diss briefs dem dikk genempten Hainrichen Vogt vom Lupoltz die vorgenant vesti Brahsperg mit den gutern, die zu der vesti in burgsass namen gehorrent, ze burgsass vnd ander zins rehtungan nutzz vnd guter, die darzu kofft sint, wie die genampt vnd gehaissen oder wa die gelegen sint, gelihen ze rehtem lehen in der mass, als die guter in dem koff brief sint geschriben, was wir im daran durch reht lihen sont, vnserm vorgenanten gotzhus vnser nahkomen vnd vns voran gantzlich vnschadlich vnd vnuergriffenlich. Vnd ist diss beschehen vnd vollfurt, als es nach vnsers gotzhus gewonhait vnd reht crafft vnd maht haben sol vnd mag ietz vnd hie nah. Vnd des ze offnem vnd warem vrkund aller vorgenanter ding habent wir vnser insigel offenlich gehenkt an disen brief. Darnach veriehent wir obgenanter Hainrich von Schellenberg vnd Walther von Kungsegg ain gantz warhait alles des, so dauor an disem brief verschriben stat, vnd darvmb das daz selbe alles war stat vnd vnwandelber belib von vns vnd vnsern erben jetz vnd hie nach, so haben wir baid fur vns vnd vnser erben ze merer sicherhait aller vorgenanter ding vnsri aignu insigel offenlich gehenkt an disen brief. Der geben ist ze sant Gallen nach Cristi geburt vierzehenhundert jar, darnach in dem ainloften jar, an sant Plasius tag.