Wir^a Albrecht von gottes gnaden abt ze sant Johann in Thurtal¹ gelegen sant Benedicten orden in Costentzer bystum||
gelegen vnd wir der conuent gemainlich da selbs ze sant Johann tund kund vnd veriehent offenlich mit disem brief,||
das wir recht vnd redlich fur vns vnser gotzhus vnd fur alle vnser nachkomen verkoffet hand die erberen frowen||
Adelhaiden Cunis Schmids von Nidren Vtzwil² elich tochter Herman, Henslin vnd Annen iri elichy kind, die sy hat bi der e by Hainrichen Schnetzer von Hennow³ irem elichen man, die selb Adelhait, Herman, Hensli vnd Anna vnser vnd vnsers gotzhus recht aigen sint, vnd hand och sy vnd alle ir nachkomen, so von inen hinnenthin eweklich iemer me koment, mit lib vnd mit gut vnd mit aller zugehord aines rechten ewigen bestaten vnwiderruflichen koffes ze koffen geben dem edeln wolgebornen herren graff Fridrich von Toggenburg⁴ vnserm gnadigen herren vnd allen sinen erben vnd nachkomen vmb acht pfunt pfenning Costentzer muns, des selben geltes wir gar vnd gentzlich von dem vorgenanten Hainrichen Schnetzer bezalt vnd gewert sint nach allem vnserm willen, vnd dar vmb so hand wir vns fur vnser gotzhus vnd fur alle vnser nachkomen an der vorgenanten Adelhaiden, Hermann, Henslin vnd Annan vnd an allen iren nachkomen, als vorgeschriben stat, gen dem vorgenanten herren graff Fridrich von Toggenburg vnd gen allen sinen erben vnd nachkomen verzigen vnd verzihent vnd entwerent vns ouch redlich vnd recht mit disem brief aller aigenschaft aller lenschaft aller manschaft aller besatzung aller gewer aller dienst vall vnd gelass aller kuntschaft aller zugnust lut vnd brief alles rechten gaistlichz vnd weltlichz gerichtes aller vordrung vnd ansprach vnd zuspruch, so wir oder ieman ander von vnser wegen oder an vnser statt hinnenthin zu ir lib oder gut konden oder mochten gewinnen oder gehaben mit dehainen dingen, luterlich an geuerde. Wir hand ouch gelopt by guten truwen fur vns vnd vnser nachkomen vnd lobent ouch vesteklich mit disem brief, der vorgenanten Adelhaiden, Hermann, Henslis vnd Annen vnd aller ir nachkomen mit lib vnd mit gut, als da vorgeschriben stat, vnd dis redlichen kofs des vorgenanten herren graff Fridrich von Toggenburg vnd aller siner erben recht gut getruw wer ze sind nach dem rechten vnd nach des landes sitten vnd gewonhait an alle geuerde, vnd hand sy ouch in nutzlich gewer gesetzet vnd setzent sy ouch dar in hablich mit disem brief. Vnd des ze warhait so hand wir Albrecht abt da vorgenant vnser aptlich insigel vnd wir das conuent vnsers capittels insigel offenlich gehenket an disen brief. Der geben ist ze sant Johann in vnserm closter an dem nachsten fritag vor sant Valentinus tag nach Cristus geburt vierzehenhundert jar vnd dar nach in dem ainlften jar.