Ich^a Burkhart von Helmsdorff hern Hainrichs von Helmsdorff¹ saligen ritters wilunt elicher sun tun kund||
offenbar mit disem brief allen, die in sehent oder horent lesen, das ich ze lehen hatt von dem erwirdigen vnser||
frowen gotzhus ze Costentz² den hof vnd jarlich zins hie nachgeschriben, item den hof gelegen ze Obrengoldah³,||
den man nemmet Spatzen hof⁴, gilt jarlich aht malter korns sant Galler messes, ain pfund pfennig Costentzer munsse vnd werung vnd ainen kloben werches, item aht schilling pfennig jarlichs zinses ab vnd usser dem hof genamt Ammergaswilr⁵ gelegen ob Sultzberg⁶ vnder den Eggen⁷, den Hans Sênnhuser ietz buwt, item sehs schilling pfenning jarlichs zinses ab vnd usser dem gut gelegen ze Obrengoldah genamt Peters Zimbermans gut, das Jacli Huser vnd Hans Keller buwent, item ab vnd usser Wetzel Pfudlers hofstatt ze Obrengoldah drije schilling vnd aht pfenning jarlichs zinses, item ab vnd usser Rudis Schetters hofstatt ze Obrengoldah zwen schilling pfenning alles der vorgenanten munss vnd werung jarlichs zinses, vnd den vorgenamten hof vnd die jarlichen zinse han ich fur mich vnd fur alle min erben durch miner besser komlicher nutzze willen verkôffet vnd han denselben hof mit grund mit grât mit akker mit wisen vnd och die jarlichen zinse mit allen desselben hofes vnd derselben zinse gewonhaiten rehten vnd zugehorden, die sigint genamt ald vngenamt wissent oder vnwissent gesucht ald vngesuht, aines staten rehten ewigen kôffes ze kôffenn gegeben dem huse vnd spitale des hailgen gaistes gelegen ze sant Gallen⁸ in der statt vmb nunzig pfund vnd vmb vier pfund guter pfenningen Costentzer munsse, vnd bin och desselben gelts gantzlich bezalt vnd han das bewendet an ander min komlicher nutzze, vnd herumb so han och ich den hof genamt Spatzen hof vnd die jarlichen zinse da vorgeseit vor dem erwirdigen fursten vnd herren hern Albrehten bischoff ze Costentz⁹ minem gnadigen herren ufgeben gefertget vnd brâht mit behugten worten vnd getaten, als es nv vnd hernach wol krafft vnd maht haben sol vnd mag nach dem rehten, hin ze handen vnd gewalt des huses vnd spittales da vorgenamt, vnd han mich da vor dem obgenamten bischoff Albrehten ze Costentz verzihen vnd entwert vnd verzih vnd entwêri mich krefftenklich mit disem brief nv vnd hernach fur mich vnd alle min erben des hofes vnd der jarlichen zinse da obgenamt gar vnd gantzlich vnd aller aigenschafft lehenschafft kuntschafft vnd brief vnd besunder des briefs, so ich vmb den hof vnd die zinse vorgenamt inne hân, darinne andri stuk vnd guter och stand, als herr Albreht vnd herr Eberhart von Burglen¹⁰ salig kofften von Hainrichen Hettlinger¹¹ vnd siner elichen wirtinen fro Frenen von Ebersberg¹², vnd och aller vrkund gezuggnuss reht vordrung vnd ansprâch vnd gemainlich aller sachen, da mit ald da von ich oder min erben ald ieman an vnser statt ald von vnsern wegen von reht ald von gewonhait gewerben ald getun kundint oder mohtint nv ald hernâch wider alles oder ihts, so diser briefe wiset. Ich vnd min erben, ob ich enwar, sond och bi wâren guten truwen des hofes vnd der jarlichen zinse da vorgenamt vnd och diss koffs mit iro rehten vnd zugehorden weren sin also vnd souil gezîtes, als landsreht ist, ân alle geuerd, vnd die ersamen wisen Lienharten Payer, Vlrichen Ffurer, Hansen Varnbuler ietz pfleger vnd maister des huses vnd spitales da obgenamt vnd iro nachkomen, welh die werdent, pfleger vnd maister desselben huses vnd spitales ân allen iro vnd desselben huses vnd spitales schaden versprechen, wenn gen wem wo vnd wie dik si des bedurffent zum rehten von des hofes vnd der zinse wegen da vorgenamt vnd diss kôffes ân alle geuerd inwendig dem zil, als diser brief bindet, wer ze sinne. Heruber ze offem vrkund han ich obgenamter Burkhart von Helmsdorff min aigen insigel fur mich vnd fur alle min erben offenlich gehenkt an disen brief. Der geben ist ze sant Gallen an dem nahsten mantag nach sant Valentinus tag im jar, do man zalt von Crists geburt vierzehenhundert jar vnd darnach im ainlofften jare.