Allen^a, die disen brief sechent oder horent lesen, kund ich Herman Schulthess von Griffense¹, das Rudolf Knopfli von Herdiberg² vnd fro Ita sin elichu wirtin si||
beide gemeinlich vnd vnuerscheidenlich anderhalb juchert reben minr oder me vngefarlich ze Herdiberg gelegen, die man nempt das ober fach im Fuler³,||
stossent einhalb an Rudolfs Knopflis gut das vnder fach, anderhalb an den Wilenbach⁴, ze der dritten siten an Heinr. Knopflis gut vnd ze der||
vierden siten an der witwen von Rospach⁵ gut, vnd sint erblen von mir jerlich vmb einhalb viertel kernen, mit steg mit weg vnd mit aller zu gehort mit miner hand willen vnd gunst recht vnd redlich ze koffen geben hand den erwirdigen geistlichen frowen frow Angnesen von Gruningen eptyschin vnd dem conuent gemeinlich des gotzhus ze Wurmspach⁶ des ordens von Cytels in Chostentzer bystum gelegen vmb hundert vnd zweij vnd drissig pfunt genger Zuricher pfenning, des selben geltes si gentzlich von inen gewert sint. Vnd durch der obgenanten Rudolfs Knopflis vnd fro Iten siner elichen wirtin ir beider ernsthafter bett do nam ich die obgenanten anderhalb juchert reben mit aller zu gehort von inen vf vnd han si wider verlichen den obgenanten minen frowen der eptyschin vnd dem conuent gemeinlich des gotzhus ze Wurmspach ze ir selbs vnd ir gotzhus vnd aller ir nachkomen wegen ze einem rechten erb von mir vnd minen erben vnd nachkomen vnd vmb den egenanten zins. Sich hand och die obgenanten Rudolf Knopfli vnd fro Ita sin elichu wirtin gentzlich enzigen aller rechtung vordrung vnd ansprach, so si oder ir erben nach den vorgenanten anderhalb juchert reben mit aller zu gehort mit geistlichen oder weltlichen gerichten ald an gericht deheine wis iemer gewinnen mochtin an geverd. Es hand och die obgenanten Rudolf Knopfli vnd fro Ita sin elichu wirtin si beide vnuerscheidenlich fur sich vnd ir erben mit guten truwen glopt, der vorgenanten anderhalb juchert reben mit aller zu gehort wer ze sinn nach recht der obgenanten miner frowen der eptyschin vnd conuentes vnd ir gotzhus vnd aller ir nachkomen fur ein recht erb von mir vnd minen erben vnd nachkomen vmb ein halb viertel kernen jerliches zins vnd vmb den egenanten kof vor geistlichen vnd weltlichen gerichten vnd mit namen an allen den stetten, wo vnd wenn oder wie dik si sin notdurftig sint, an all geverd. Her vber ze einem offenn vrkund so han ich min insigel von ir ernsthaften bett wegen, doch mir vnd minen erben vnschedlich an vnsern zinsen vnd an allen vnsern rechten, offenlich gehenkt an disen brief. Der geben ist an dem ersten tag aberellen nach gottes geburt vierzechenhundert vnd in dem einliften jar. Hie bi waren Heinr. Rufs, Johs. Rufs, Jos Knopfli, Heinr. Wilnhelm von Rospach vnd ander erber lut.