Ich^a Anna Lupfensakkin Jaken Tomans salgen elichu wittwe vnd wir disu nâchbenempten iro baider elichu||
kind Cunrat, Jacob, Hainrich, Anna, Lucya vnd Margaretha burger ze Veltkirch¹ veriehent vnd tund kund||
allermenglichem mit disem offenn brief, das wir allusament gemainlich vnd vnuerschaidenlich mit guter||
williger vorbetrachtung ze den zyten vnd tagen, do wir es mit dem rechten fur vns vnd all vnser erben wol kreffteklich getun mochtent, mit Johansen Littschers des stattammans hand ze Veltkirch² vnd ôuch sunderlich nâch rât vnd mit gutem willen vnd gunst vnsers ohem vnd rechten vogtz Rudis Wyssen ains burgers ze Veltkirch recht vnd redlich ze kôffent geben habint ains bestaten vngevarlichen ewigen kôffs vnd ôuch fur recht ledig vnuerkumbert aigen gut dem erwirdigen vnserm lieben gnadigen herren abbt Albrechten vnd dem couent gemainlich des gotzhuses ze sant Johann im Thurtal³ in Costentzer bistum gelegen vnd iren nâchkomen vnd och nammlich dem gotzhus sant Benedicten ordens vnsern aigenn halbtail vnd nammlich allu vnsru recht, so wir hând an dem zehenden mitenander grôssem vnd klainem jungem vnd altem, wie das nammen hât, nichtz vssgenomen, von dem hof mit siner zugehord genant ze Môs⁴ in Getzner⁵ kilchspel gelegen, da inen der ander halbtail des selben zehenden vormals zugehoret, als si in von Hansen Lupfensakks salgen erben aigenlich gekôfft hând nâch iro briefs sag, mit allen sinen rechten nutzzen fruchten guten gewonhaiten ehafftinen vnd zugehorden benempten vnd vnbenempten vmb siben pfund alles guter genamer pfenning Costentzer munss, dero wir von her Vlrichen dem Kriechen couentherren ze sant Johann, der och disen kôff getân hât, an barem gelt gantzlich gewert vnd bezalt sind, mit dem geding, das wir vnd all vnser erben vnuerschaidenlich des ewigen redlichen kôffs vnd nammlich^b aller hievorgeschribner ding vmb den egenanten vnsern aigenn halbtail des zehenden ze Môs mit siner zugehord, als vor ist beschaiden, iro vnd iro nâchkomen vnd och nammlich des obgenanten gotzhuses gut vnd getruw wern vnd gewern sin sond nâch recht vnd an iren schaden, wa vnd gegen wem su des an gaistlichem vnd an weltlichem gericht ald an andren stetten iemer bedurffent ald notdurfftig werdent, mit guten truwen ân all widerred vnd gevard. Darnach vergich ich vorgenanter vogt Rudi Wyss, das die obgenanten Anna Lupfensakkin vnd iru kind dis obgeschriben ir ewigs verkôffen vnd hingeben nâch minem willen rât vnd gunst getân vnd vollfurt hand. Vnd des alles ze wârem offem vrkund vnd stater fester sicherhait nv vnd hienach so hand si vnd ich disen brief ernstlich gebetten besigeln mit des obgenanten ammans Littschers insigel, darvnder wir vns willeklich vnd festeklich verbunden habint vnd bindent des obgedachten vnsers ewigen verkôffens vnd nammlich aller hievorgeschribner ding, vnd doch ich egenanter Rudi Wyss nit furbas denn als ain vogt billich tun sol mir vnd minen erben vnschadlich, das selb min insigel ich ietzgenanter amman Littscher durch iro aller ernstlicher vergicht vnd bett willen ze ainer wâren gezuggnuss vnd festen bestatnuss aller hievorgeschribner ding des kôffs doch mir vnd minen erben vnschadlich gehenkt hab an disen brief. Der ze Veltkirch geben ward an dem nachsten zinstag nâch yngandem maygen nach Crists geburt viertzehenhundert vnd darnach im ainlufften jâr.