Ich^a Hans Yberger waibel ze Wil¹ vergich offenlich vnd tun kunt allermenglichem, daz fur mich kâment ze Wil in der statt in offem gericht vff den huttigen tag, als dirre brief||
geben ist, do ich daselbs an des fromen Hainrichs Ledergerwen schulthaissen ze Wil² statt mit sinem vollen gewalt offenlich ze gericht sazz, die fromen lut Hans Spatz||
burger ze Wil, Rudi Fryg von Eschlikon³, Cuni von Braitenlow⁴, Cuni Stetter von Stetten⁵, Adelhait Vinkin Eberlis Vinken eliche wirtenn mit maister Engelharten||
dem artzat vnd Adelhait Landin von Branow⁶ Hansen Liebs eliche wirtenn mit Hansen Rimlin iren erkornen vogten, mit den vogten, so do baid mit der ietzgenanten iro elichen mannen willen mit gericht vnd vrtail beuogtent wurdent, vnd Wandla Studenrussin wilent Conrats Studenruss eliche wirtenn vnd Verena Stetterin von Stetten, vnd stundent dieselben ietzgenanten zwo frowen dar fur mich in offen gericht vnd sprachent, daz sy die egenant Wandla Studenrussin nach irem nehsten vattermag vnd sy die egenant Verena Stetterin nach irem elichen man geworben hettint acht gantz tag vnd mer ân all geuard, vnd daz sy die nit gehaben mochtent, vnd swurent ouch darvmb baid gelert aid zu den hailigen, als inen mit rechter vrtail ertailt ward. Vnd nach dem als sy geswurn hattent, do wart nach miner frag mit gemainer vrtail ertailt, daz sy nemen soltent ir ietwedru ainen erbern man ze vogt an des gerichtes ring, wen sy wolten, vnd daz denn des genug war vnd wol krafft hetti. Do nam die egenant Wandla Studenrussin ze vogt Hansen Bischouff den alten, vnd Verena Stetterin nam ze vogt Hansen Korherren. Vnd staltent sich ouch dieselben frôwen alle vier mit denselben iren vogten, als recht waz, vber dis nachgeschriben sach, vnd verlech ich inen allen die vogtye in derselben sach nach der statt ze Wil recht sitten vnd gewonhait. Vnd offnotent da alle sament gelichlich vor mir in offem gericht mit Hainrichen von Loppen irem fursprechen vnd sprachent, daz sy alle achti an barem gelt nach irem nutz vnd willen gentzlich ingenomen vnd enpfangen habint von dem erbern knecht Vlin Schenk genant Metzger burger ze Wil nun pfund guter vnd gaber Costentzer muns, vnd haben im vnd sinen erben dar vmb wissentklich vnd wolbedacht fur sich vnd alle iro erben ains rechten redlichen vngeuarlichen ewigen kouffs ze kouffen geben iro aignen akker vnd invang, dar vs ietz angevangen ist ain wis ze machen, obnan an Wilmatt⁷ gelegen vnd stosset an den weg, der vff die matt gat, vnd andrethalb an die landstrazz, die gegen Rikkenbach⁸ gat, vnd vndan an den fussstig, der von derselben landstrazz gat vber die matt zu sant Peters⁹ kilchen mit allen rechten nutzen gewonhaiten vnd zugehorten fur recht ledig vnuerkumbert vnansprachig aigen vnd dar fur, daz niemant nutz dar ab gange denn ierlich dru viertel kernen Wiler messz ze almusen vnd daz der zehend von dem vndrentail nid dem markstain, der ietz in derselben wisen stat, vnd nebent dem markstain gegen dem winkel landstrazzhalb gange, vnd daz der tail gegen der hurd vnd dem weg, der in die matt gat, vntz hinab an den birbom, der in dem zun matthalb stat, dehainen zehenden nit geben solli, wol gange ierlich ab demselben tail ain viertel kernen in den grossen houff ze Wil vnd nit anders, vnd woltent im ouch denselben akker vnd den invang also vnd dar fur zu sinen vnd siner erben handen bringen vnd vertgen nach dem rechten, vnd wellint sich ouch alle achti ietz hie vor mir in gericht nach dem rechten fur sich vnd alle iro erben verzihen vnd entweren desselben akkers vnd des invangs vnd des loben recht weren also ze sint nach dem rechten. Vnd nach dem do der egenant maister Engelhart die egenant Adelhaiten Vinkinen vnd Hans Rimli, Adelhaiten Landinen vnd Hans Bischouff, Wandlan Studenrussinen vnd Hans Korherr, Verenen Stetterinen dristund vsser des gerichtes ring gefurtent vnd sy ze ieklichem mal gefrâgtent, ob sy die vertgung die verzihung vnd lobung vnbetwungenlich tattint vnd wilklich vnd gern tun woltent vnd do ze dem dritten mal wider in daz gericht offenlich by iren aiden gesaitent, daz sy inen iekliche fur sich selber iekliches mals gesait habint, daz sy es vnbetwungenlich tugint vnd wilklich vnd gern tun wellint, vnd nach dem do vertgotent vnd gabent do zestett die obgenanten Hans Spatz, Rudi Fryg, Cuni von Braitenlow vnd Cuni Stetter mit iren handen vnd die obgenanten vier frowen mit iren vnd mit der obgenanten iro vogten handen den obgenanten akker vnd den invang mit aller zugehort dem obgenanten Vlin Schenken vnd sinen erben mit gelerten worten an des gerichtes stab, als recht sitt vnd gewonlich waz vnd als nach miner frag mit rechter gesamnoter vrtail ertailt ward. Vnd verzigen vnd entwertent sich do zestett vor mir in offem gericht die obgenanten vier man mit iren handen vnd die egenanten vier frowen mit iren vnd der egenanten iro vogten handen fur sich vnd iro erben mit gelerten worten an des gerichtes stab vnd verzihent vnd entwerent sich ouch redlich vnd recht mit disem brief gegen Vlin Schenken vnd sinen erben des obgenanten akkers vnd invangs, also daz enweder sy noch iro erben sament noch besunder noch niemant andrer von iro wegen darzu gantzlich noch an dehainem tail dehain recht vordrung noch ansprach mit recht noch an recht niemermer gehaben noch gewinnen sollent noch wellint enweder von aigenschafft noch von dehainerlay andren sach wegen, so iemant erdenken kan, vnd lobtent ouch do in gericht alle achti by guten truwen an des gerichtes stab vnd lobent ouch ietz alle gemainlich vnd vnuerschaidenlich fur sich vnd alle ir erben, des obgenanten akkers vnd invangs mit allen rechten vnd zugehorten fur recht ledig vnuerkumbert vnansprachig aigen vnd dar fur, daz niemant nichtz dar ab gange denn als vorbeschaiden ist, vnd dis redlichen kouffs des obgenanten Vlis Schenken vnd siner erben gen allermenglichem allenthalben, wenn wa wie dik sy des noturfftig sint vnd dar an von iemant gesumpt ald geierret oder dar vmb vfgetriben ald angesprochen wurdint, recht weren ze sint vnd sy dar vmb allweg zeuerstande vnd zeversprechent vnd von der ansprach in iren kosten ze entrihent vnd ze ledgent an alle werwort vnd furtzug nach dem rechten vnd nach aigens recht gentzlich ân des obgenanten Vlis Schenken vnd an siner erben schaden an alle geuarde. Vnd won dis recht also redlich vor mir in gericht vollgangen ist, als vor beschaiden ist, darvmb so han ich dem obgenanten Vlin Schenken disen brief mit rechter vrtail versigelten geben mit des obgenanten schulthaissen anhangendem insigel von des gerichtz wegen, an denselben disen brief so haben wir obgenanten maister Engelhart, Hans Bischouff vnd Hans Korherr ouch vnsre insigel in vogten wis vns vnd vnsern erben vnschadlich gehenkt, vnder derselben vnser vogten insigel wir obgenanten Adelhait Vinkin, Wandla Studenrussin vnd Verena Stetterin vns wilklich verbunden haben aller vorgeschribner ding, vnd ze merrer sicherhait der obgenanten ding so han ich obgenanter Hans Rimli der obgenanten Adelhaiten Landinen vogt mit ernst erbetten den fromen Vlrichen Estrich alt schulthaizz ze Wil¹⁰, daz er sin insigel fur mich in vogtes wis offenlich gehenkt hat an disen brief, douch im selb vnd mir vnd vnsern erben gar an schaden, darvnder ich obgenante Adelhait Landin mich verbunden han aller vorgeschriben ding. Geben ze Wil mit rechter vrtail an crutzmittwochen nach Cristi geburt vierzehenhundert jar vnd dar nach in dem ainlifften iar. H.W. Per Hainricum von Loppen Johannes Bubgamper.