Allen^a den, die disen brief ansehent lesent oder horent lesen, kund ich Rudolf Wingarter des edeln wolerbornen herren||
graff Fridrichs von Toggenburg amptman¹ mines genadigen herren vnd vergich offenlich mit disem brief, das ich vff||
den tag vnd in dem jar, als der brief geben ist, an des vorgenanten mines herren statt mit vollem gewalt vnd von||
sines haissens vnd beuelhens wegen ze Obren Batzenhaid² offenlich ze geriht sass, vnd kam da fur mich der from vest Vlrich von Lonberg³ ze denen ziten sesshaft ze Wil⁴ ze ainem tail vnd Vlrich Aichorn wilent Hanses Aichornen burger ze Liechtenstaig⁵ elicher sun ze dem andren tail, vnd also offnot do der obgenant Vlrich von Lonberg vor mir mit sinem fursprechen vnd sprach, das er jarlich hette vff aller hailigen tag zway pfunt pfenning Costentzer muns jarlichs geltes vnd ewiges zinses, das sin recht aigen wer, vor vs vor ab vnd vor manklichem vss vnd ab der Bulhub⁶ vnd vss vnd ab der Staig hub⁶ ze Obren Batzenhaid gelegen, vnd wer ouch die selben baid huben bute nusse oder inne hette, der solte im oder sinen erben jarlich vff aller hailigen tag, als vor stat, die vorgenanten zway pfunt pfenning Costentzer muns jarliches geltes vnd zinses geben vnd vsrichten vor allen andren nutzen vnd zinsen an geuerde, die vorgenanten zway pfunt geltes, als vor stat, er der vorgenant Vlrich Lonberg dem vorgenanten Hansen Aichornen saligen vnd Katherinen siner elichen husfrowen recht vnd redlich ze koffenn geben hette vnd allen iren erben vmb siben vnd trissig pfunt pfenning Costentzer muns, des selben geltes er ouch gar vnd gentzlich von inen bezalt wer, vnd wan aber der obgenant Hans Aichorn abgestorben wer vor vnd ee, dz er im vnd der vorgenanten Katherinen vnd iren erben die vorgenanten zway pfunt pfenning geltes zu iren handen bracht vnd geuertgot hette, dar vmb so wolt er die selben zway pfunt pfenning geltes vnd ellu sini recht, als vor stat, fur sich vnd alle sin erben vf geben vnd die bringen zu des obgenanten Vlrichs Aichornen handen, wie recht wer vnd im ertailt wurd, an statt vnd in namen Katherinen siner elichen muter vnd ir erben handen, vnd nach des obgenanten Vlrichs Lonbergs vergicht vnd nach frag vnd vrtel do gie der selb Vlrich Lonberg mit sinem fursprechen dar vnd graiff an des gerichtes stab vnd gab da ledklich vnd frilich vf vnd verzech sich da recht vnd redlich fur sich vnd alle sin erben der vorgenanten zway pfunt pfennig Costentzer muns ewiges geltes vnd zinses vss vnd ab den vorgenanten baiden huben vnd aller siner rechten, die er dar an ye gehebt hett, mit gelerten worten von sinen handen an des gerichtes stab hin zu des obgenanten Vlrichs Aichornen handen an statt vnd in namen Katherinen siner elichen muter vnd ir erben handen, alz reht vnd vrtel gab vnd als mit gemainer vrtel ertailt ward, vnd verzicht vnd entwert sich ouch des alles redlich vnd recht mit disem brief vnd darzu aller aigenschaft lehenschaft manschaft besatzung gewer alles tails aller gemaind aller kuntschaft zugnust lut vnd briefen alles rechten gaistlichs vnd weltlichs gerichtes aller vordrung ansprach vnd zuspruch vnd alles des, so ieman erdenken kan, vnd lobt ouch do fur sich vnd alle sin erben vnd lobet ouch vesteklich mit disem brief, der vorgenanten zway pfunt pfenning Costentzer muns jarlichs ewiges geltes vnd zinses vss vnd ab den vorgenanten baiden huben vnd dis redlichen koffes in aller vorgeschribener wis des obgenanten Vlrichs Aichornen an statt vnd in namen Katherinen siner elichen muter vnd aller ir erben reht gut nutz weren ze sind gen allermanklichem allenthalben vff gaistlichen vnd weltlichen gerichten, wenn wie wa vnd als dik, so daz ze schulden kunt, ob sy dar vmb von iemann vfgetriben oder angesprochen wurdin, vnd sy dar vmb allwegen von allen ansprachen an allen iren schaden ledig vnd los vnd vnklagber ze machen nach dem rechten vnd nach des landes sitten vnd gewonhait an geuerde. Vnd also satzt do der obgenant Vlrich von Lonberg den vorgenanten Vlrichen Aichornen an statt vnd in namen Katherinen siner elichen muter vnd ir erben in liplich nutzlich gewalt vnd gewer vnd setzt sy ouch darin fur sich vnd alle sin erben hablich mit disem brief. Vnd des alles ze warhait so han ich obgenanter richter min insigel von des gerichtes wegen offenlich gehenket an disen brief, doch dem vorgenanten minen herren graff Fridrich von Toggenburg vnd sinen erben an allen iren rechten nutzen vnd zinsen vnschadlich, vnd des ze noch merer sicherhait aller vorgeschribener ding so han ich Vlrich von Lonberg da obgenant min insigel fur mich vnd min erben offenlich gehenket an disen brief. Der geben ist mit rechter vrtel an dem nachsten fritag vor sant Gallen tag nach Cristus geburt vierzehenhundert jar vnd dar nach in dem ainloften jar.