Ich^a Rudolf von Rosenberg von Zukkerriet¹ tun kund vnd vergich offenlich mit disem brief, dz ich recht vnd redlich fur||
mich vnd alle min erben verkoffet han die erberen Margareten Bollinen, die man nempt Dudin, wilent Vlis Bollen,||
den man nampt Dudi von Sundischwil², elichen tochter, die min reht aigen ist, vnd han die mit lib vnd mit gut||
vnd mit aller zugehord fur mich vnd alle min erben recht vnd redlich ze koffenn geben den erwirdigen gaistlichen Albrecht abt vnd dem conuent gemainlich des gotzhus ze sant Johann in Thurtal³ sant Benedictus orden in Costentzer bystum gelegen irem gotzhus vnd allen iren nachkomen vmb vier pfunt pfenning Costentzer muns, dero ich gar vnd gentzlich von der vorgenanten Margareten bezalt vnd gewert bin, hier vmb so han ich mich gen den vorgenanten Albreht abt dem conuent dem vorgenanten irem gotzhus vnd gen allen iren nachkomen an der vorgenanten Margareten vnd an allen iren nachkomen, so von ir hinnenthin eweklich iemer me koment vnd geboren werdent, an ir lib vnd an ir gut fur mich vnd alle min erben verzigen aller aigenschaft aller lehenschaft manschaft erbschaft besatzung gewer alles tails aller gemaind aller recht rechtung dienst bussen vall vnd gelass alles rechten gaistlichs vnd weltlichs gerichtes aller vordrung ansprach vnd zuspruch, so ich oder min vordern bis her zu ir lib oder gut ye gehebt hand oder so ich oder min erben hinnenthin jemer me zu inen gewinnen oder gehaben konden oder mochten mit recht oder an reht vor tod oder nach tod oder mit dehainen dingen, so jeman erdenken kan, vnd verzich vnd entwer mich des alles reht vnd redlich fur mich vnd alle min erben mit disem brief, vnd han ouch die obgenant Margareten mit lib vnd mit gut, als vor stat, vfgeben geuertgot vnd zu des vorgenanten gotzhus handen bracht, als reht sitt vnd gewonlich was vnd als es gut kraft vnd maht hat vnd haben sol ietz vnd hie nach, vnd han ouch gelobt fur mich vnd alle min erben vnd loben ouch vesteklich mit disem brief, der vorgenanten Margareten vnd dis redlichen kofs in aller vorgeschribener wis des obgenanten gotzhus ze sant Johann reht wer ze sind gen allermanklichem vff gaistlichen vnd weltlichen gerichten gen gaistlichen vnd weltlichen luten vnd allenthalben, wenn wie wa vnd als dik, so das ze schulden kunt, nach dem rehten vnd nach des landes sitten vnd gewonhait an geuerde, vnd han ouch die vorgenanten Albreht abt den conuent alle ir nachkomen vnd dz vorgenant ir gotzhus ze sant Johann in liplich nutzlich hablich gewer gesetzt vnd setz sy ouch dar in hablich mit disem brief. Vnd des alles ze warhait so han ich Rudolf von Rosenberg da obgenant min insigel fur mich vnd alle min erben offenlich gehenket an disen brief. Der geben ist ze Ramschwag⁴ vff miner vesti an sant Gallen abent nach Cristus geburt vierzehenhundert jar vnd dar nach in dem ainlufften jar.