Ich Eglolff Visch burger ze sant Gallen tun kunt offenbar mit disem brieff, das fur mich kam der bescheiden knecht Welti ab Kornberg¹ burger ze sant Gallen mit Annen ab Kornberg siner elichen wirtin, vnd gab mir do der selb Welti ab Kornberg willenklich vnd wolbedachtklich vff an min hand einen halben teil des gutes genant Bischoffberg² gelegen zwuschent Bischoffs Ow³ Rutegg⁴ Talergemeind⁵ vnd Fronschwendi⁶, den er von mir ze liberbzinslehen hatt, vnd batt mich den selben sinen halben teil des gutes genampt Bischoffberg ze lihen ze liberbzinslehen vnd ze rechter gemeind. Do erhort ich des selben Walthers ab Kornberg flissig bett vnd lech vnd lich ouch recht vnd redlich mit disem brieff dem selben Walther ab Kornberg vnd Annen siner elichen wirtin einen halben teil des gutes genant Bischoffberg ze liberbzinslehen vnd ze rechter gemeind inen beiden gemeinlich vnd vnuerscheidenlich nach gemeind vnd liberbzinslehen gewonheit vnd recht, doch mit rechter bedingt mir vnd minen erben an vnser lehenschafft zinsen rechten vnschedlich an geuerd. Vnd ist dis alles volfurt vnd beschechen mit solichen worten vnd och werken, als es wol krafft haben sol nu vnd hienach. Des ze warem vrkund han ich obgenempter Eglolff Visch min insigel gehenkt an disen brieff von der lehenschafft wegen. Geben ze sant Gallen an zinstag nach sant Gallen tag, do man zalt von gotz geburt vierzehen hundert jar, dar nach in dem einlifften jare.