Ich^a Rudolff Vsserman, den man nemmet Tobler, burger ze sant Gallen vnd ich Wîbrat Vssermannin sin elichi wirtLinne tun kund offenbar mit disem brief fur vns fur alle vnser erben vnd nachkomen, das wir baidi ainberklich||
durch vnser bessrer nutzzen willen verkoffet haben drissig schilling pfenning alles guter vnd genamer Costenzer||
munss vnd werung ab vnd vsser grund grât wunn waid steg weg gebom aker veld gebuwen vnd vngebuwen gezimberen vnd gemainlich ab vnd vsser allen vnd ieklichen nutzzen gewonhaiten rehten vnd zugehorden vnsers berges gelegen ze sant Gallen, der da stôsset obsich an Jaclis Stillenfritags berg nidsich an vnser swoster der Rôtinen vnd ir mannes tail desselben berges, der des obgeseiten vnsers berges getailit ist, vnd nebent sich an Vlrichs Ffurers gut genamt Volisberg¹ vnd an die offnen strâss gegen Torna¹, vnd haben die vorgeseiten drissig schilling pfenning ze jarlichem zins aines staten ewigen kôffes ze kôffenn gegeben dem ersamen wîsen manne maister Hansen dem Landen von Bischoffzell² burger ze sant Gallen vnd sinen erben, ob er enist, vmb viervndzwainzig pfund pfenning guter Costentzer munsse, vnd siyen och desselben gantzlich bezalt vnd haben dasselbe gelt bewendet an ander vnser besser nutzze, vnd darvmb so sond wir baidi vnuerschaidenlich vnd vnser êrben vnd nachkomen, die den obgeseiten vnsern berg ietz oder hernach innehand buwent oder niessent, dem vorgenamten maister Hans Landen sinen erben vnd nâchkomen ietz vff sant Martins tag den nahsten, der nv kumt nach datum diss briefs, vnd darnach och allerjarlich ieklichs jâres besunder vff sant Martins tag des hailigen bischoffs ab vnd vsser aller rehten vnd zugehorden des egeseiten vnsers berges ze rehtem zinse geben ân allen abgang vnd ân alle minrung ze iro handen geben ân allen iren schaden ze sant Gallen in der statt drissig schilling pfenning ie danne ze sant Gallen guter genger Costentzer munss vnd werung. Welhes jâres aber wir oder vnser êrben ald nachkomen dem egeseiten maister Hans Landen oder sinen êrben ald nachkomen die vorgeseiten drissig schilling pfenning jarlichs zinses niht rihtint vff sant Martins tag des hailigen bischoffs ze iren handen ze sant Gallen in der statt ân allen iro schaden, so mugent derselb maister Hans Land sin êrben vnd nachkomen ieklichs jares nach dem vorgenamten sant Martins tag, wenne si wellent, selber oder durch iro furwesen ald helffer vns vnd vnser erben vnd nâchkomen, welh danne den egeseiten vnsern berg innehand buwent oder niessent, vftrîben noten vnd schadgen mit gaistlichen vnd weltlichen gerihten gemainlich ald mit wedrem si wellent besunder vnd vff dem egeseiten vnserm berge pfenden vnd den angrîffen vnd verkôffen ze sant Gallen an offner gant vmb den zins, der inen ie danne ab vnd vsser dem egeseiten vnserm berge gefallen vnd niht worden ist, vnd och vmb den schaden, in den si da von komen sind von vorgeseiter oder andrer sachen wegen. Wir haben och dem vorgenamten maister Hans Landen die vorgeseiten drissig schilling pfenning jarlichs zinses ab vnd vsser allen rehten vnd zugehorden des vorgenamten vnsers berges ze sinen handen gefertget vnd braht von dem erwirdigen gotzhus ze sant Gallen, als es nv vnd hernach wol krafft vnd maht haben sol vnd mag nach dem rehten, fur vns vnd fur alle vnser erben vnd nachkomen. Wir baidi gemainlich vnd vnuerschaidenlich vnd vnser êrben, ob wir enwarint, sond och bi rehten wâren truwen dero vorgenamter drissig schilling pfenningen jarlichs zinses ab vnd vsser allen rehten vnd zugehorden des vorgeschribnen vnsers berges vnd och diss kôffes weren sin vnd den egenamten maister Hans Landen vnd sin êrben, ob er enist, ân allen iro schaden darumb verstân, als lang als dik an allen den stetten vnd also, als ze sant Gallen vmb solich zins vnd koff reht vnd gewonlich ist, vnd wider alles noch wider ihtes, so diser brief wîset, sol niht ze wort noch ze schirme gehebt noch gesucht werden gaistlich noch weltlich reht frihait gesetzt gewonhait vngewitter krieg aht ban noch iht anders, das ist bedinget fur ierrung vnd infall. Des alles ze offem vrkund han ich obgenamter Rudolff Vsserman min aigen insigel fur mich vnd min êrben vnd nachkomen gehenkt an disen brief, vnd ich vorgenamti Wîbrât Vssermannin han erbetten, won ich aigens insigels niht hab, den erbern wolbeschaidnen Hansen Segesser den metzger burger ze sant Gallen, das er sin aigen inisgel im selber vnd sinen êrben vnschadlich fur mich vnd min erben vnd nachkomen gehenkt hat an disen brief. Geben ze sant Gallen am nahsten donstag nach sant Othmars tag im jare, do man zalt von Crists geburt vierzehenhundert jâr vnd darnach im ainlofften jare.