Wir^a der amman vnd die lantlut gemeinlich des landes ze Appazell¹ tun kunt allen dien, die disen brief sechent oder horent lesen, das wir mit gutem rât vnd sinneklicher vorbetrachtung ze nutz vnd ze eren vnsers landes vnd luten||
vnd l durch fromung willen gemeinlich des landes der fursichtigen wisen des burgermeisters der raten vnd burgern gemeinlich der statt Zurich des schultheissen der raten vnd burgern gemeinlich der statt Lutzern² l der||
ammannen vnd der lantluten gemeinlich der lendern ze Vre³ ze Switz⁴ vnd ze Vnderwalden⁵ des ammans der raten vnd burgern Zug⁶ vnd des amptes gemeinlich, die zu Zug gehorent, vnd des ammans vnd der lantluten||
l gemeinlich ze Glarus⁷ burger vnd lantlut worden syen, vnd haben dz von inen ewenklich an vns genomen vnd enpfangen mit dien gedingen, als hie nach geschriben sint. Des ersten, were, das die obgenanten stett vnd walttstett si alle oder vnder inen dehein statt oder land besunder nu oder her nach mit jeman, wer der were, missehellung vnd krieg hettend oder gewunnent, welich statt oder land dann die krieg an ruret vnd an gât, die dann die andern eidgnossen ze manen hant nach ir buntbriefen wisung, die selben hant ouch dann gewalt, vns die vorgenanten den amman vnd die lantlut ze Appazell oder vnsern amman besunder ouch vmb hilff ze manen, vnd sullent dann wir die selben von Appazell dien, so dann gemant hant, vnd ouch allen andern iren eidgnossen nach der manung vnuerzogenlich vnd âne alle widerred mit vnsern liben vnd mit vnserm gut vnd mit vnser macht, die wir dann gehaben mugen, zu inen oder anderswo hin, do hin wir dann gemant sint, zuchen vnd inen behulffen vnd beraten sin vnd darzu vnser bestes tun, als ob die sach vnser eigen sach were, âne alle geuerd, vnd sullent ouch die hilff gentzlich in vnserm costen tun, wie dik dz ze schulden kunt, âne der eidgnossen schaden vngefarlich. Were ouch, das wir die vorgenanten von Appazell mit jeman, wer die werent, jetzu oder hie nach stoss vnd krieg hetten oder gewunnent vnd vns duchte, das wir darinne der eidgnossen helff notdurftig werent, das mugent wir den vorgenanten stetten vnd waltstetten mit vnsern botten oder briefen in ir rat verkunden vnd ze wissen tun. Dunket dann ir rat in stetten oder in lendern ald die botten, so dar zu geschikt werdent, das wir die vorgenanten von Appazell nach gelegenheit der sach von inen helff notdurftig syen, wie vil si vns dann bewabnoter mannen von iren stetten vnd lendern ze helff sendent, da mit sullent wir ein benugen haben, vnd sullent wir dann dien soldnern ir jeklichem alle tag vier krutz blaphart ze sold geben vnd ouch alle die wile, so si in vnserm dienst sint, vnd sol der sold an vachen des tags, so die soldner von ir husern scheident vngefarlich. Doch so hant die obgenanten stett vnd waltstett inen selben gentzlich vorbehept vnd vssgelassen die bund, so si mit einander vnd ouch vor der dât dis briefs getan hant. Ouch sullent wir die vorgenanten lantlut ze Appazell keinen krieg nicht an vachen vnd ouch nieman vssrenthalb der eidgnoschaft in keinem krieg nicht behulffen noch beraten sin âne der obgenanten stetten vnd waltstetten rât wissen vnd willen âne geuerd. Item vmb geltschulden vnd vmb solich sachen sol jederman von dem andern recht nemen an den stetten vnd in den gerichten, do der ansprechig sitzet vnd hin gehort, vngefarlich. Aber sin rechten gelten oder burgen mag jederman verheften vnd verbieten, als dz in der obgenanten eidgnossen bunden verschriben ist. Vmb zinse den mag jederman vordern vnd inziechen, als dz vntz her gewonlich gewesen ist, âne geuerd. Ware ouch, das wir die obgenanten lantlut ze Appazell die obgenanten stett oder waltstett sament oder vnder inen dehein statt oder land besunder vmb ir erber botschaft bitten wurdent, ze vnsern sachen ze riten oder ze varen, die botten sol man vns nicht versagen, doch das die selben botten in vnser der von Appazell costen vnd vff vnsern schaden riten oder varen âne geuerd. Wurdent ouch die obgenanten stett vnd waltstett hinnenhin jemer mit einander missehellig vnd stossig oder vnder inen dehein statt oder land besunder, das got ewenklich wende, der stossen vnd missehellung ensullent wir die vorgenanten lantlut ze Appazell vns in dehein wise nicht an nemen, won dz wir vff dewederm teil in dien sachen nieman hilfflichen noch bistendig sin sullent, es were dann, dz wir vnser erbern botten zu den sachen schikten, ob wir die mit fruntschaft vereinen mochten, dz mugent wir wol tun âne geuerd. Item so hant dann wir die vorgenanten lantlut ze Appazell wir alle gemeinlich vnd vnder vns jeklicher besunder, was mannen oder knaben ist, die sechtzechen jar alt vnd elter sint, gelert eid ze got vnd ze den heilgen mit vfgehepten handen gesworn, das wir alle vnd die zu vns gehorent vnd vnser jeklicher besunder den vorgenanten stetten vnd waltstetten allen vnd dem merteil stetten vnd lendern vnder inen gehorsam sin sullent âne alle geuerd. Vnd bi denselben vnsern eiden hant wir gelopt vnd verheissen, iren vnd aller ir burger vnd lantluten, die jetz zu inen allen oder deheiner statt oder land besunder gehorent oder her nach also zu inen gehoren werdent, schaden ze warnen vnd ze wenden vnd ir êre vnd nutz ze furdern, als verr wir kunnen oder mugen, âne alle arglist vngefarlich. Die obgenanten stett vnd waltstett hant inen selben mit bedingeten worten vorbehept vnd vsgelassen, das si gemeinlich oder der merteil vnder inen oder ir nachkomen dise vorgeschriben stuk vnd geding si alle vnd ir jekliches besunder meren vnd minren mugen, wenne si wellen vnd si dz nutz dunket, âne menliches irrung vnd widerred vngefarlich. Vnd her uber ze einem waren vnd vesten vrkund aller diser vorgeschribener dingen so haben wir die vorgenanten von Appazell vnsers gemeinen landes insigel offenlich gehenkt an disen brief. Der geben ist an sant Catherinen abend, do man zalt von Cristus geburt vierzechenhundert jar, dar nach in dem einliften jare.