Ich^a Johans Volger burger ze Liechtensteig¹ rechter geborner vogt Claren Dietlikoninnen wilent Jakli Dietlikons salgen burgers ze Winterthur² elichen||
tochter vergich vnd tun kunt allermenglichem mit disem brieff, alz mir die fromen wisen schultheis vnd rat ze Winterthur an derselben Claren DietLlikoninnen statt vnd von ir wegen einer ledigen fryen gab geben hant alle die varenden hab vnd gut, so derselben Claren von irem vatter salgen ze erb ald von ir||
muter ze teil worden ist, es syent pfandschatz geltschulden hustrag bettgewat ald ander varend gut, wie dz genant ald geheissen ist, das ich darvmb vnd von des wegen mit denselben schultheissen vnd rat ze Winterthur lieblich vnd fruntlich vber komen bin vnd inen fur mich vnd alle mini erben gelopt vnd versprochen han in solicher mazz, alz hie nach bescheiden ist, vnd loben vnd versprich inen och jetz vestenklich mit disem brieff, des ersten dz ich vnd alle mini erben, ob ich enwar, vmb dieselben varenden hab an derselben Clauren Dietlikoninnen vnd an ir erben schaden gelten vnd hinnan ze dem nachstkunftigen sant Johans tag des Toffers ze sunwendi gantzlich aber gen vnd vssrichten sont alle die geltschulden, so dieselb Clar Dietlikoninnin vff disen huttigen tag, alz dirr brieff geben ist, von deheinerley sach wegen jemant schuldig ist ald gelten sol, vssgenomen die funfzehen pfund haller, so dieselb Claur schuldig belibt Hansen irem ledigen bruder, dieselben funfzehen pfund haller ich nit gelten sol, wan dz er die haben sol vff der eigenschaft derselben Claren huses ze Winterthur an dem Obermarkt gelegen, vnd dz ich och dz selb kint Claren Dietlikoninnen, wenn sy die obgenant ir muter nit lenger haben wil, vnuerzogenlich zu mir nemen vnd^b ze Liechtensteig by mir in minen kosten haben vnd im hunger vnd frost bussen vnd es in eren haben sol, alz ob es min eigen kint wary, an geuard, vntz dz dz selb kint druzehen jar alt wirt vngeuarlich, vnd dz ich dazwuschan noch dar nach desselben kindes lib noch gut nit verandren noch dar vss noch da mit nicht tun noch wandlen sol denn mit eins schultheissen vnd ratz ze Winterthur wissen rat vnd willen, vnd dz ich och dzselb kint in allem rechtem also by mir ze Liechtensteig haben sol, alz ob es by siner frunden einem ze Winterthur in der statt wari, an geuard. Vnd wenn ich ald min erben denn nach dem egenanten zil oder dar vor von einem schultheissen vnd rat ze Winterthur, wer denn je ze den ziten schultheis vnd rat ze Winterthur sint, hiervmb ermant werdent, dz wir denn by geswornem eid, so ich ietz dar vmb getan vnd gesworn han, nach derselben manung inwendig einem manot dem nechsten dz obgenant kint Claren Dietlikonninen einem schultheissen vnd rat gen Winterthur in die statt wider antwurten sont an allen furzug vnd widerred an geuard. Vnd war aber, ob dzselb kint dazwuschan von todes wegen abgienge oder wenn es dar nach an liberben abgiengi, so sont mir vnd minen erben allweg alli vnsri recht zu desselben kindes erb vnd gut, so es denn hinder im lat, gantzlich behalten sin nach vnser statt recht ze Winterthur an geuard. Des alles ze warem offem vrkund so han ich erbetten den fromen Vlrichen Eigendal burger ze Winterthur, dz er sin insigel fur mich vnd mini erben offenlich gehenkt hat an disen brieff, wan ich eigens insigels nit han, das och ich derselb Eigendal also getan han von siner bett wegen, doch mir vnd minen erben an schaden. Geben nach Cristz geburt vierzehehundert jar, darnach in dem einliften jar, an dem nechsten zinstag nach sant Andres tag.