Ich^a Vlrich von Landenberg gesezzen ze Wulflingen¹ bekenne vnd tun kund menglich mit disem offenn brieue, daz ich von der zuspruch wegen, so der beschaiden Jos Pfender||
von Veltkirch² gehept hat zu dem erwirdigen apt Albrehten dez gotzhus zu sant Yohann im Turtal³ von der nachbenempten gut vnd guter wegen, das stuk dez wingarten ze||
Frowis⁴, dem man spricht Vyol⁵, mit dem ynfang, als dis markan begriffen hand, dez ersten stozt der wingart vnd infang ze der ainen siten an Haintzen Snetzers wingarten, zu der andern||
siten stozt er an der selben herren wingarten, dannen vfhin an den Borhuser vnd vndan vf an des Borhusers gut vnd obnan nider an Frowiner wisan, vnd darzu den torggel, der darunder gelegen ist, mit aller zugehorde alles torggelgeschierr, daz darzu hort, vnd darzu des egenanten Borhusers wingarten gelegen in Berchten velde⁵ vnd daz holtz vnd studach grund vnd grat gelegen ob dem selben dez Borhusers wingarten, vnd dannan anhin ob dem Vyol vntz an die gassen, vnd die dritten zainen oder den drittentail dez obs vnd der nvss dez geboms in Berchten velde, die je nit vf den ietzgedachten gutern stand, die selben sin ansprauch vnd recht der selb Jos Pfender ererbt hat von wilent dem Harsch seiligen von Veltkirch, dez gemainer vnd erbe er gewesen ist zu allem dem vnd er verlazzen hat, ligendem vnd varndem nvt vsgenomen, als er des gut zugknus vnd kuntschaft gehept vnd furbracht hat von vil erberen luten, die darumb vor dem richter ze Rankwil⁶ geseit vnd gesworn hand, das in daz kund vnd wissent gewesen sig nach dez briefz lut vnd sag, den er ouch darumb zogt vnd furbracht, ain gemainer man gewesen vnd darumb mit den nachbenempten schidluten mit namen Johansen dem Derrer vnd Hainrich Grunenbergen von Costentz von Josen Pfenders wegen, Albrechten Kircherren von Costentz vnd Nycolaw dem Schulthaizzen wilent statschriber⁷ daselbs von dez egenanten abtz wegen zu dem rechten gesezzen bin ze Costentz in der stat vf den tag, als datum dis briefz wiset vnd seit. Vnd nach dem als si ze baider sit ir zuspruch red vnd widerrede fur vns brachten vnd in sunders den obgenanten brief, wie er Harschen seiligen erb vnd gemainder ist gewesen zu allem dem vnd er gelazzen hat, namen wir der erberen wisen lut hilf darinne, der vil ze gagen warent, vnd brachten die sach vf vns vnd zu vnsern handen baidiv ze minne vnd ze recht in solicher masz, das si vns ze baider sit lobten vnd vns ietweder besunder sin truw in aids wise gab, wie wir si entschieden vnd darumb richten, daz ouch si dabi beliben vnd das stat halten wolten fur sich alle ir erben vnd nachkomen vnd fur menglich von iren wegen. Also nach rate vnd vnderwisung der selben gegenwurtigen personan vnd vnser selbs vernunft vnd verstantnus so haben wir die stos vnd sachen in fruntschaft vnd minne wise, doch daz div minne dem rechten glich ist, als wir vns verstanden haben, entzwischan in baider sit gutlich verricht in die form, als hernach begriffen wirt. Dez ersten, waz ietwederm tail vber die sach geloffen ist von zerung briefkost oder ander sach wegen, das sol ze baider sit absin schad gen schad ane guerde, vnd was brief oder rechten der Harsch seilig vnd der egenant Jos Pfender vber dis sach vnd vber div vorgenanten gut je gehept erlangot oder erworben hand von fursten oder herren gaistlichen oder weltlichen luten oder gerichten, sprechen wir, daz daz alles ouch tode vnd ab sol sin gentzlich vnd gar luterlich vnd aller ding. Vnd die selben brief vnd rechten all vnd ir ieglichen besunder sol der obgenant Jos Pfender dem egenanten abt Albrehten vnd sinem gotzhus vnuerzogenlich zu sinen handen antwurten vnd geben ane alle geuerde. Bestund aber dehainer vorhanden vnd behalten, ir were lutzel oder vil, die sond doch furo, wa si furkoment oder geoffnot werdent, ewklich kraftlos vnd tod haizzen vnd sin vnd dem abt vnd sinem gotzhus vnd sinen nachkomen kainen schaden nymmermer bringen in kainen weg. Si sont ouch von der stos vnd sachen wegen ainander luter gut frunde haizzen vnd sin vnd ainander darumb frivnde ze frivnden gewinnen ane all geuerde. Wir sprechen ouch, daz der egenant abt Albrecht des gotzhus zu sant Johann im Turtal vnd all sin nachkomen vnd ouch dasselb gotzhus bi den obgenanten guten vnd wingarten, wie die von alter herkomen sint, mit aller zugehorde nv hinnanthin ewklich beliben vnd der obgnant Jos Pfender ledklich dauon stan sol, vnd sont weder er noch sin erben noch niemand von sin vnd des Harschen seiligen wegen den obgenanten abt noch sin gotzhus noch niemand von iren wegen daran nymmermer bekumbern noch bekrenken vnd kain vordrung ansprauch noch recht mit dehainen gerichten gaistlichen noch weltlichen noch ane gericht noch gemainlich mit dehainen andern sachen furzogen noch funden noch mit dehains herren noch niemands andre hilf noch rate darzu nymmermer gewinnen noch han in kainen weg. Wir sprechen ouch vmb den win, der dis jar da geuallen vnd worden ist, daz der dem abt ledig vnd los volgen werden vnd beliben sol ane menglichs widerrede. Vnd darumb vnd fur dis zuspruch alle sprechen wir, das der abt vnd sin gotzhus zu sant Johann im Turtal dem egenanten Josen Pfender vnd sinen erben richten vnd geben sond vier vnd funftzig pfund pfening guter vnd gaber Costentzer muns vnd werung nach dez gultbriefz lut vnd sag, den im der abt vnd der conuent darumb versigelt vnd gegeben hand. Vnd ze warem offem vrkund vnd stater ewiger sicherhait aller vorgeschribner ding so han ich obgenanter Vlrich von Landenberg der gemain vnd wir vorgenanten vier schidlute vnsre insigel von baidertail flissiger bett wegen zu ainer waren gezivgknus vnd bedahtnus aller vorgeschribner ding, doch vns vnd vnsern erben vnschadlich vnd ane allen schaden, offenlich gehenkt an disen brief, vnder div selben funf insigel vnd darzu vnder vnsre aigne insigel, die wir ouch daran gehenkt haben, wir vns baid vorgenant tail verbinden aller vorgeschribner ding vnd sach bi den truwen, so wir darumb in aids wise gelopt haben, als vorgeschriben stat. Geben an sant Nycolaws tag in dem iar, als man zalt nach Cristi geburt vierzehenhundert iar vnd darnach in dem ainlifften jare, ind. quarta.