Allen^a den, die disen brief ansehent oder horent lesen, kund ich Lienhart Payer burger ze sant Gallen vnd vergich offenlich an disem brief||
fur mich vnd alle min erben, das ich mit guter vorbetrahtunge gesundes libes vnd wolbesintes mutes ze der zit, do ich es mit reht||
wol getun moht, voran got ze lob durch min selbes miner vordern vnd nachkomen selen hailes vnd trostes willen minen drittentail||
vnd allu mine reht vnd rehtung der zehenden vff den drin Eggen¹, die man nempt die Ober Egge, die Mittel Egge vnd die Vnder Egg, die min lehen gewesen sint von dem erwirdigen gotzhus ze sant Gallen, mit allen rehten vnd mit allen iren zugehorden frilich vnd willenklich reht vnd redlich gegeben vnd geuertgot hân, gib die wissentlich in kraft dis offenn briefs an das gotzhus ze Maggenôwe² mit solicher beschaidenhait vnd in dem rehten dinge vnd gedinge, das dz selbe vorgeseit gotzhus ze Maggenôwe die selben mine reht der obgeschriben zehenden vff den drin Eggen nun hinnenhin innemen haben niessen besetzen vnd entsetzen sond vnd mugent, als ich vnd min vordern bis her uff disen huttigen tag, als dirre brief geben ist, getân hand, doch Vlrichen Gossler ôch burger ze sant Gallen vnd sinen erben vnd nachkomen an iren rehten des ainen mut kornes baider korn, so inen vorus allerjarlich von den selben zehenden werden sol nach sines briefs lut vnd sag, gantzlich ân schaden. Ich hân mich ôch verzigen vnd verzih mich mit disem brief der vorgeschriben zehenden ab vnd von den vorgedahten drin Eggen mit aller zugehorde aller aigenschaft aller lehenschaft aller kuntschaft alles vszugs aller gewer vnd zugnust lut vnd brief alles rehten gaistlichs vnd weltlichs gerihtes aller vordrung vnd ansprachen aller reht vnd rehtung, so ich ald min erben daran vnd darzu gehebt habin vntz her uff disen huttigen tag, als dirre brief geben ist, ald furbz in kunftigen ziten iemer gehaben oder gewinnen mohtin, vnd dz ich noch min erben noch nieman an vnser statt noch von vnser wegen das vorgenamt gotzhus ze Maggenôw kain sin lut noch gut noch sin nachkomen darvmb niemerme sollent noch wellent ansprechen vftriben noch in kain wise beswarren weder mit gaistlichem noch weltlichem geriht noch ân geriht noch mit dehainen andren sachen ân alle geuerde. Ich hân ôch gelôpt vnd loben mit disem brief fur mich vnd min erben, miner rehtung dirre vorgeschriben zehenden vnd dirre gâbe reht weren ze sind nach landes reht vnd dz vorgenamt gotzhus ze Maggenôw ân allen schaden darvmb ze versprechent vnd ze verstand, als dik es darvmb angesprochen wirt mit dem rehten. Vrkund dis briefs. Geben versigelt fur mich vnd min erben mit minem aigen anhangenden insigel an sant Thomas abent vor wihennahten in dem jar, do man zalt von Cristus geburt vierzehenhundert jar, darnach in dem ainloften jar.