Min willig dienst ze allen ziten vor, alz och billich ist, gnedigen herren, alz ir||
mir verschriben hant von der stozz wegen zwuschant den von Appentzell¹ vnd mir,||
wie ich komen solle zu vch in vwer statt, ir wellint die sach verhoren vnd dar||
zu reden, dz ir getruwint, dz die sach fruntlich vbertragen werd, vnd mir dar vff geben hant frid vnd geleit zu vch zu der tading ze koment vnd wider von vch an min gewarsami, des danken ich vch flissig mit gantzem ernst vnd lan vch wissen, dz ich vch des vnd grossers wol getruwen, vnd alz ir mir frid vnd geleit geben hant fur vch vnd die vwern vnd die zu vch gehorent, dunkt mich nicht, dz mir dar vff fuglich sye zu vch ze koment, es war denn, dz ich och^a ein frye geleit hette von denen von Appenzell vnd den iren vnd die zu inen gehorent, so wolt ich gern komen^b also zu der tading vnd mich vch dar inne alz fruntlich lassen wissen, dz ir merktint, dz ich keine vnglinpfe begerti. Ist och, dz sy mir die von Appenzell och also ein frye geleit gent fur sy vnd die iren vnd die zu inen gehorent, so wil ich gern also komen vnd mich in der sach nach gelegenheit der sach alz fruntlich lassen wisen, dz man mir keinen vnglinpf nit gibt, vnd truwen och vch wol, war ich jetz by vch, ich war vwer halb vnd die zu vch gehorent sicher gnug vnd hulfint mir dar zu ich gelinpff vnd recht hetti, alz och menglichem wol ze wissent ist, dz ich gottlich vnd gelinpff vnd recht in der sach han. Lieben herren, so ist mich och furkomen, wie die von Appenzell minem herren graff Wilhelmen² in siner vangnust vffgehebt habint, wie er mir wider sy in der sach beholfen vnd beraten sye, sol vwer gnad wissen, wer dz redet, dz man da minem herren vnd mir vnrecht tut, wan min herr hat mir dar zu weder geholfen noch geraten, vnd ist och do ze mal, do ich die von Appenzell ze acht erklegt, hie by in lands nit gewesen vnd bin och nit anders by im denn alz ein ander werchman, der im werchot vmb sinen lon vnd hilft vnd rat mir weder lutzel noch vil in diser sach, vnd was man minem herren dar vmb zu redt, dz man im da vnrecht tut. Geben an sunntag vor Thome anno Christi undecimo. Herman Eggler von Gunten³.