Ich^a Haintz von Rumblang¹ bekenn vnd vergich offenbar an disem briefe fur mich vnd alle min helffer diener vnd die minen von aller der stoss spenn vnd misshellung wegen, so geweLsen sint vntz her uff disen huttigen tage, als dirre briefe ist geben, zwuschen den ersamen fursihtigen vnd wisen den burgermaistern vnd gemainden des hailigen riches stetten||
in Swaben, als die in verainvng mit enander sint vnd zu diser nachgeschriben sach gehorent, ain sidt vnd minhalb ander sidt von der vbergriff wegen, als ir knecht vnd diener||
in der zit, als sy mit miner gnadigen herschaft von Osterrich in kriegen wârent, disen nachgenempten minen vogtluten Fritschin Kayser, Vlin im Tan², Jaclin Brandman vnd Cunin Schedler von Burgôw³ zugriffent viengent vnd schatztent in der mainvng, als sy sprechent, das sy nit anders wissdint, denn das sy Hainrichen von Rumblang⁴ minem vetterm zugehortint, der ze den ziten ir offner entseiter vyent was, da sich aber erfunden vnd bewiset hât, das sy mir von pfleg wegen Wernher Giels salgen kinden von Glatburg⁵ mines vettern zugehorent vnd ze versprechent stând, das ich der selben stoss spenn vnd misshellung, es sye vmb schatzung nâmen schaden vnd vmb ander sachen, wie die herkomen vnd vfgelôffen sint, sy syent genempt ald vngenempt vergessen ald vnuergessen, nach rât vnd vnderwisung des edeln wolerbornen grâf Fridrichs von Toggenburg⁶ mines gnadigen herren vnd der fursihtigen wysen des burgermaisters vnd der rate ze sant Gallen, die sich mit tadingen getruwlich hierinne gearbait hant, tugentlich vnd fruntlich luterlich vnd gantzlich schleht eben vnd verriht worden bin, vnd hand mir fur alle vordrung vnd ansprachen, die ich vntz her zu inen gehebt han, es syg von schatzung von nâmen von schaden ald von ander sachen wegen, wie die darrurent, niht hindan gesetzt, geben vnd zu minen handen bezalt hundert vnd sehzig Rinscher guldin guter an gold vnd vollen swarer an gewiht, die ich an minen schinberen nutzz bekert hân. Hiervmb so han ich versprochen vnd gelopt versprich vnd loben mit disem offenn briefe by miner truwe fur mich alle min helffer diener vnd die minen vnd mit sunderhait fur des vorgenamten Wernher Giels mines vettern salgen kind vnd die vorgeseiten min vogtlut, denen die obgeschriben zugriff nâmen schatzung vnd schaden beschehen sint, also das wir noch vnser erben noch nieman an vnser statt noch von vnser wegen die vorgedahten dekain iro erben nachkomen helffer diener noch die iren, die ietz zu inen gehorent ald noch zu inen gehorent werdent gemainlich noch sunderlich, vmb dis vorgeschriben zugriff nâmen schatzung vnd schaden, den wir von inen vnd den iren enpfangen habint, noch vmb was sich da zwuschen bis her vergangen vnd erlôffen hât, niemer me sollent noch wellent ansprechen vftriben bekumberren bekrenken noch in kain wise beswarren weder mit geriht noch ân reht mit worten noch mit werken noch mit dehainen andren sachen, vnd darvmb iro luter vnd gut frund ze sind ân alle arglist vfsatz vnd geuerde. Vnd des ze wârem offemm vrkunde gib ich inen disen briefe hieruber gevestnot vnd besigelten fur mich alle min alle min helffer diener vnd die minen vnd fur des obgenamten Wernher Giels mines vettern salgen kind, der vogt ich bin, mit minem aignen anhangenden insigel, vnd darzu han ich erbetten den obgenamten minen gnadigen herren grâf Fridrichen von Toggenburg vnd die obgenamten den burgermaister vnd den rât der obgeschriben statt sant Gallen, das sy iru insigel ze ainer gezugnust dirre vorgeschriben rihtung, won sy ôch da mit vnd dirre sach vndertadinger gewesen sind, zu minem insigel an disen brief gehenkt hand, des och wir die selben grâf Fridrich der burgermaister vnd der rât der egenamten statt sant Gallen offenlich an disem brief veriehent vns vnd vnsren erben vnd nachkomen vnd der obgeschriben statt sant Gallen gantzlich ân schaden. Geben an sant Thomas tag vor wihennahten in dem jare, do man zalt von Cristus geburt vierzehenhundert jar, darnach in dem ainloften jar.