Vniversis Christi fidelibus, ad quos peruenerit presens scriptum, Johannes dei gratia ecclesie Pragensis episcopus in perpetuum. Quoniam ex officii nostri sollicitudine tenemur piis fidelium votis annuere et illis maxime, quibus eterne uite meritum augetur et commodum religiose uiuentibus augmentatur, nobilis viri dilecti compatris nostri Wokkonis de Rosenberch marscalci Boemie peticionem tanto beniuolentius admisimus, quanto eam plenius cognouimus de magne deuotionis fomite processisse. Siquidem pro subleuatione nouelle plantacionis sue monasterii videlicet de Altovado Cisterciensis ordinis nostre dyocesis ius patronatus ecclesie de Wezzel, quod ipse iuste possidet et quiete, de consensu nobilis vxoris sue Hedwidis monasterio contulit supradicto petens humiliter, quatenus nos ipsam donationem ratam habentes permissione nostra dignaremur firmare et ius patronatus predicte ecclesie de Vezzel sepedicto monasterio de Altovado in possessionem perpetuam instrumento auctentico confirmare. Nos vero peticionem hanc advertentes rationabilem et deuotam auctoritate omnipotentis dei et beati Viti martyris ius patronatus ecclesie de Vezzel monasterio de Altovado in possessionem perpetuam presentis scripti patrocinio confirmamus. Nulli ergo hominum liceat hanc confirmationis nostre paginam infringere aut ei ausu temerario contraire. Si quis autem hominum nostre iurisdictionis contrarium attemptare presumpserit ipso facto sic nouerit excommunicationis sententiam incidisse. Datum Prage tercio Idus Junii. Pontificatus nostri anno tercio. Testes autem qui aderant sunt: Dominus Witigo de Chůmenowe. Dominus Albertus de Borschowe. Dominus Bilungus. Dominus Jacobus. Dominus Hirzo. Dominus Hotizlaus. Dominus Nicolaus. Dominus Gerbertus. Dominus Liupoldus. Benisius cum fratribus suis; et alii quam plures, Acta sunt hec anno domini M^o. CC^o. lX^o I^o.

Source Fulltext: PANGERL, Stift Hohenfurth (=FRA II/23, Wien 1865) S. 13