Ego Wocho de Rosenberch sciens ineuitabile omnibus esse mori, dum essem in extremis diebus uite mee, compos tamen adhuc mentis mee, subscripta fieri decreui et uolo ab omnibus amicis meis inmutabiliter obseruari. Notum sit vniuersis, quibus presens littera fuerit demonstrata, quod Hedewigi uxori mee dilecte disposui et plane dedi uniuersa bona mea, tam res mobiles quam omnes redditus meos, ut utatur eis et habeat una cum pueris meis libere sicut ue it tam diu, ut caste in sede uiduali curauerit residere. Si uero voluntarie a pueris suis separari et diuidi uoluerit et caste absque marito uixerit, habeat Pudeiauz cum attinentiis suis, Strobnitz cum pertinentiis suis, et Wezzal cum cum (sic) omnibus que ad hoc pertinent, et Gemundam habeat tantum pro peccunia ut ei primo fuerat obligata, et dotem que ei in primo contractu sponsalium a me fuerat assignata. Illa uero bona citra Gemundam que denariis meis redemi, domine de Potendorf reddo integraliter et relaxo. Si autem uxor mea uiro alii uiro (sic) nubere uoluerit, Strobnitz cum attinentiis suis et Wezzal cum omnibus, que ad hoc pertinent, et Gemundam et dotem suam cum curia supra Swant habeat et recedat. Item litem que inter me et patruum meum Budewoy uertitur de Schinta, sic decido, quod ipse ad claustrum in Slegel det pro anime mee remedio, si mihi cedat de iure, aut illuc det pro anime sue remedio, si de iure sibi cedat, aut metipse super animam suam retineat; hoc eius conscientie sic relinquo. Item peto et inuoco gratiam domini mei regis, ut ducentas marcas argenti quas canonicis Pragensibus dedi, faciat restitui et triginta marcas de eadem recipiat peccunia, quia triginta marcas de peccunia comiti de Wirtenberch danda de Styr. iam recepi. De residua autem peccunia predicatoribus de Auzt, quicquid ipsis soluere teneor, persoluatur; et post hec domine Cristine de Praga, quidquid superfluum fuerit, tribuatur. Item Hermanno de Lettowitz do maius Pomerswitz, ut michi ignoscat, quod dominum meum regem pro ipso non ammonui, ut sperabat. Vlrico etiam de Hohenpurch minus Pomerswitz dedi et eum a bonis meis aliis penitus exclusi. Item Borute uillam meam Ruzin assigno nomine pignoris pro peccunia, quam adhuc sibi soluere debui, sicut Zwatemiro meo militi bene constat, aut reddat pueris meis peccuniam quam ipsi dedi, si uillam uoluerit retinere. Item pueris sororis mee do Pritschit in cambium pro Dobricho, si habere uoluerint uel dent domino Jerusio compatri meo, et reddet ipsis Dobricho. Pro eo autem quod usus sum bonis eorum, do eis Vletitz et illas duas uillas, quas habent Zwatebor et Petrus. Item domino Hoztizlao pro triginta tribus marcis argenti, quas ipsis soluere debui, Paschitz dedi, si tantum ualeat, si uero non ualeat, tantum residuum de bonis meis illi persoluatur. Et Benate duas hubas in Treboni, que mel soluunt, pro decem marcis argenti et in pignore assignaui. Item Alberoni de Rotenstain duas maiores uillas supra Swant contuli, ut habeat a pueris meis in feodo. Curiam autem et agros contra Sumerowe et interiores agros contra Ybenstain usque ad metas Boemie do vxori mee. Item uolo, ut Schecow tres ille uille uendantur domino Predote pro centum septuaginta marcis, et soluatur inde fratribus de Sancto Clemente, si quinque marce auri ipsis non sint integraliter persolute. Et quinque marce auri soluantur inde pueris domini Bawari secundum conscientiam domini Benisii sororii domini Bawari et domini Predote iam predicti. Et triginta marce argenti dentur inde homini, qui pro anima mea uadat ad Pruthenos. Et uendantur uiginti marce pro XXX^a talentis Wiennensibus, et XV talenta dentur in Durrenpach, et XV in Gors, et residuum in Tyn et circa in villis secundum domini Hoztizlai conscientiam persoluatur. Item homini de Patauia pro uiginti marcis argenti in Leimpach dentur due hube, sed si gratiam mihi fecerit, tantum una. Item Rudigero notario vxori sue et suis heredibus dedi Kirspovm uillam libere cum omni iure, ita tamen quod inde vxori mee, dum uiuit, seruiat obsequia debita per scripturam, et tantum uiginti marcas argenti, si a pueris meis et vxore recedere uoluerit, habeat super uillam iam predictam. Item Koyate carnerario in Stybnitz tres hubas dedi, illas inquam, que iudicis fuerant, dum uiuebat. Item Cunrado de Turdeling uillam Gutenprvn, quam prius a me tenuit in feodo, in proprietatem dedi, ita tamen quod nunquam se, dum uiuit, a pueris meis seruiendo ipsis fideliter alienet; et duo molendina iuxta aquam Strobnitz, et quatuor hubas in Fridrichisslage eidem Cunrado pro triginta marcis argenti obligaui uel habeat in feodo, si sibi uidebitur expedire. Item quicquid in Gunthersrevt habeo solutum, Kalhocho contuli in feodo; et reddo Andree militi suam uillam. Item ad claustrum Hohenvurt dedi Plawe, Nouum Forum, et quicquid ex ista parte Wulte habeo, pro anime mee remedio et successoium meorum salute et remedio animarum. Item uolo, ut Budewoy patruus meus Lohemilo det uillam unam de meis possessionibus ex altera parte Pritschitz, ubi ipsum sua discretio ammonebit. Item uolo, ut idem patruus meus Bodewoy illi militi, cuius dextrarium accepi, uillam illam assignet in pignore iterato, que prius ipsi fuerat assignata, et ille due uille reddantur ecclesie, ut est iustum, quas idem miles habet. Item uolo, ut dominus Zwatemirus pro quadraginta marcis argenti uillam meam Treboni assignet in pignore domino Borsoni, ut indultum et remissum michi sit, si ipsum in commutatione quam feci pro Strobnitz, aliqualiter defraudaui; et non multum rogetur, sed addatur ei aliquid, si quadraginta marcas beniuole rennuerit acceptare. Item uolo, ut Bvdewoy patruus meus pro quinquaginta marcis argenti obliget Bozeiowitz uillam meam et distribuatur illud argentum inter orphanos meos et orphanos fratris mei, seruos illos scilicet, quorum patres a me nulla feoda tenuerunt. Et quatuordecim equi quos frater meus reliquit in Pribenitz, distribuantur similiter inter illos, ex una parte secundum conscientiam domini Prehtelini, domini Gerberti, Cunradi de Turdeling; ex parte uero altera secundum conscientiam domini Zwatemiri, domini Predote et domini Hoztizlai, ut unicuique pro obsequii sui merito tribuatur. Item Budelao uillam meam Babenberch obligationis titulo assignaui pro quadraginta talentis Wiennensium denariorum, quas sibi dare promisi cum uxore sua, cum eam sibi legitime copulaui. Item eidem curiam in suburbio castri Rosenberch dedi, ut in ea resideat pro purchhuta. Item Werenhardo marstellario curiam unam in Mutscherat dedi, illam que quondam Berhtoldo carpentario seruiebat. Item Gvilloni in Emerndorf quatuor benefitia contuli iure et tytulo feodali. Item hospitalario de Pirn sex marcas denar., quas ei soluere debeo, iubeo sibi dari, et arma mea similiter sibi dedi. Monachis de Hohenvurt uasa mea argentea et dextrarium meum dedi. Vt autem hec suprascripta robur habeant firmitatis, presentem litteram in testimonium scribi iussi et sigillo prioris de Petow et sigillo custodis minorum fratrum de Gretz et sigillo proprio roborari. Acta sunt autem hec presentibus fratre Gotfrido et fratre Ottone sacerdotibus ordinis predicatorum, domino Prehtelino, Cunrado offitiali, Koyta et Grillone camerariis, Rudigero notario, et aliis multis. Datum in Gretz anno gratie domini millesimo ducentesimo sexagesimo secundo pridie Nonas Junii.

Source Fulltext: PANGERL, Stift Hohenfurth (=FRA II/23, Wien 1865) S. 17-20