Nos frater H. abbas de Wilhering existentes in actv visitacionis filie nostre Altivadensis ecclesie, assidentibus nobis reuerendis patribus domino Th. abbate de Sancta Corona nec non domino Frid. abbate de Cella Angelorum, veridica relacione didicimus, quosdam denarios videlicet CX talenta denariorum Wienensium veterum dominum Stephanum quondam abbatem Altivadi atque dominum Bartholomevm venerabilem abbatem eiusdem ecclesie moti (sic) paterna pietäte ibidem dedisse conuentui, quos rursus prefatus pater dominus Barth, ab ipso suo conuentu nomine mutui propter necessitatem sibi inminentem constat recepisse. Animaduertentes igitur affectuque paterno metuentes dictos Christi milites priuatos temporali solacio, quo post labores necessario recreantur, in ipsis etiam dei laudes inminui volumus et auctoritate visitatoria precipimus et mandamus quatenus singulis annis dominus abbas x libras reddituum conuentui teneatur exsoluere, quousque CX libras denariorum, quos sibi compaciendo mutuauit, insimul constiterit exsoluisse. Annectentes nichilominus et volentes, vt conuentus in piscina semel in ebdomada piscandi facultatem habeat, et super hiis atque aliis pitanciis, que conventui exhibentur, vnum ex ipsis eligant, qui omni diligencia conuentui de solaciis prouideat, secundum quod eidem conuentui gratum fuerit et acceptum. In cuius rei testimonium fieri iussimus presens scriptum sigilli nostri necnon predictorum venerabilium patrum sigillorum munimine roboratum. Actum et datum anno domini millesimo trecentesimo xx^mo sequenti die post octauas apostolorum Petri et Pauli.

Source Fulltext: PANGERL, Stift Hohenfurth (=FRA II/23, Wien 1865) S. 68-69