Ich Peter von Rosenberch oberister chamrer des chunigreichs in Pehemlant offen vnd vergich an diesem brief vnd tuen chunt allen den, die in sehent oder hornt lesen, daz ich gesatzt han tzwai doerfer datz Zetbunne vnd ze dem Nicolts mit allem dem vnd dar zve gehoert ze holtz vnd ze veld versuecht vnd vnunersucht, redelein vnd recht, als ichs gehabt han, dem erbern vnd dem getrewen ritter hern Bohunken von Harach fuer an drei achtzk mark ietigs silbers, immer vier vnd sechtzk grozzer Prager phenning fuer ein march;auf den vaschanch der schirist chumt, so schol ich mein guet loesen.Tet ich des nicht, so schol iz iem auer sten ein jar vnd schol alle ierlich losung sein ze vaschang, vnd mer: ich schol auch des guets vnd des satzs sein herre vnd sein gewer, sein voyt vnd sein schermer sein, also lants recht ist. Geschech auer daz, des got nicht engeb, daz wir baid sturben ich vnd her Bohunk, e daz daz vorgenant guet gelöst wuerd, so schulen meinev chint seiner chinde voyt vnd schermer sein als lang vntzd iz geloest wiert. Vnd daz iem daz stet vnd vnuerchert beleib, dar vber gib ich iem disen ofen brief zeinem verchund mit meinem hangunden insigel wol versigelt vnd bestet. Der red sint zevg her Bonizlab von Malabitz, her Michs von Buednabitz, her Puerchart, her Alber von Harach, her Witzk von Lenkaev, Dietrich vnd sein bruder Witzk von Harach, Jacob von Harach, Vlreich von Rumen, vnd ander erber leut gnuech, di der red zevg sint. Der brief ist geben nach Christes gebuert tausent jar drev hundert jar dar nach in dem fumph vnd tzwaintzkisten jar an sant Thomas tag.

Source Fulltext: PANGERL, Stift Hohenfurth (=FRA II/23, Wien 1865) S. 71