Ich Johan von Mychnitz vnd ich Wanat puergraf vnd ich Nycla schaffer von Rosenberch veriehen vnd tuen chunt offenbar an disem prief alle den, di in lesent oder lesen hoerent, di nu lebent oder hernach chvmftig sint, daz der erber herr apt Thoman von Hohenfuert ein recht het hintz seinem holden Hermann von Crakawitz; darvber wuerd wier genomen paydenthalben zv schiedlevten vnd haben daz besehaiden vnd vertaidigt, also sam hie geschriben stet. Der vorgenant Herman het genomen var etleichen jaren ein hantfest vber sein chaufrecht ze Crakawitz von dem ersam herren apt Thomann von Hohenfuert vnd von der erbern sampmung, devselben hantfest macht er nicht gezaigen; chem div selb hantfest fuerwaz immer fuerd levt anz liecht, so scholz chain recht vnd nichteznicht chreft haben. Er schol dienen alle jar vam hof ze Crakawitz ein halbs phunt vnd gantzen zehent gen chloster, vnd der hold, den er var dem tar hat gehabt, der schol fuerwaz ander niemant dienen den demselben chloster ze Hohenfuert. Disev schidung hat der vorgenant Herman im vnd seinem chaufrecht ze Crakawitz genomen zv einem recht vnd hat daz getan vnbedwunchleich vnd mit gar guetleichen willen Daz wier der sach ewig tzevg sein, darum geb wier disen prief bestetigten vnd wol versigelten mit vnser allen drein anhangenden insigeln. Diser prief ist gegeben da von Christez gepuerd ergangen warden drevtzechen hundert jar darnach in dem acht vnd dreiskistem jar tzvnwenten.

Source Fulltext: PANGERL, Stift Hohenfurth (=FRA II/23, Wien 1865) S. 82