Ich Hans von Weitra vnd ich Chonrat Stozzel purger ze Chrems vnd ich Nycla zu der selbn zeit richter ze Mautaren veriehn offnbar an disem brief vmb den chrieg, den her Ortolf der Teuffenpekch gefueret vnd gehabt hat von des gotshauss wegen von Reychersperg gen Weicharten dem Mawraer vnd gen vern Agnesen seiner hausvrowen vnd irer paider erbn vmb daz haus, daz da leit ze Chrems in dem aereich ze nast Reychersperger hof, mit samt dem gaertlein, daz darzue geharet. Der selb chrieg des selbn hauses ist redleich vnd ordenleich bericht vnd auzgetragen mit sogetaner beschaidenhait, daz der vor gnant Weichart oder sein hausvrow oder ir erbn dem egnantn gotshaus alle iar hin fuer ewichleichen von haus vnd von gaertlein reichen vnd dienen schulln in irem hof ze Chrems ze rechtem purchrecht aller iaerichleichen an sand Merten tag sechtzk pfenning vnd an sand Jorgen tag drey schilling Wienner mvnz, di zo den selbn taegen gibich vnd gaebich sind. Vnd als offt daz vor gnant haus verchoufft vnd veraendert wierdet, so schulln da von gevalln fvmfzehen ze anlait vnd fvmfzehn ze ablait Wiener pfenning. Vnd da von daz der oft gnant Weichart nicht aygens insigel hat, da von hat er vns gepeten, daz wier zv einem gezeug dirrer verschribn sache vnser insigel an disen brief gehangen habn. Der prief ist gegebn an sand Symons tag do man von Christi gepuerd zalt dreutzehn hvndert jar dar nach in dem acht vnd dreizkistm jar.

Source Fulltext: PANGERL, Anhang Stift Hohenfurth (=FRA II/23, Wien 1865) S. 393-394