Ich Domyn von Passawerslag vergich vnd tven chunt offenbar an disem prief allen den, di in sehent oder lesent oder hoerent lesen, daz ich mit wol verdachtem mvet vnd mit meiner pesten vrevnt rat durch meiner sel willen vnd aller meiner voruodern sel ze einem rechten selgeraet gib vnd geben han der gemain der samnung dez chlosters dacz dem Hohenfuert ze einer pesservng irer pfrvent zway lehen, dacz Kalicz in dem dorf, daz mein vreis vnd mein rechts aygen ist gewesen, vnd daz niderhalb des weges zder tenken hant leit, da man von Passawerslag gen Chrumnaw reitt, da izunt auf gesessen sint Jacob vnd Haertel vnd Andre der richter, in allem dem recht vnd ichs in aygens recht mit allem nucz herpracht han, also gib ichs ledichleich der samnung dez vor geschriben chlosters ze Hohenfuert. Also beschaidenleich ob ich verschied an gerben, dez got nicht engeb, wem dann daz aygen angeviell, der schol der vorgenanten samnung ze Hohenfuert geben dreizzichk schok grosser phenning Prager mvense, so wirt daz aygen von in ledig. Di weil man in dez vorgenanten gvet nicht geit, so schullen si is inne haben in allem dem recht, vnd si ander ir aygen gvet inne habent. Vnd dar vmb pitt ich meinen genaedigen herren hern Petern von Rosenberch, daz er diser sach vnd diser red rechter zevg vnd schermer mit seinem insigel an disem prief sey. Vnd ich Domyn von Passawerslag gib disen prief ze einem rechten vrchvend vnd zv einer bestaetigvng, daz disev red gancz vnd vnzebrochen beleib ewichleich, wol versigelt mit meinem insigel. Diser prief ist gegeben ze Hohenfurt in dem chloster, da von Christes geburt ergangen warn drevczehenhundert jar, dar nach in dem ain vnd viertzigisten jar an sand Johannes tag ze sunbenten.

Source Fulltext: PANGERL, Stift Hohenfurth (=FRA II/23, Wien 1865) S. 85-86