Ich Paul von Harach vergich vnd tuen chunt offenbar an disem prief allen den, di in lesent seclient oder hoerent lesent, di nv lebent oder hernach chvmftig sint, daz ich mit gvetem willen mit verdachtem mvete vnd mit veraintem rat vnd mit meyner havsvrawen vron Stenken gveten willen vnd ander meyner vrevnd gvnst zv der zeit, do ich iz wol getven moecht, gegeben han den erbern herren der sampmvng gemain ze Hohenfvrt ain lehen, dacz den Angreren, da auf siczet Perichtolt vnd seyn sun Symon, do man von dient alle jar an acht drevezehen schilling phenning, also daz sev davon begen schvellen meyner mveter Perchten jartag der got genad mit ayner ewigen gedechtnvez nach ires ordens gewanhait vnd mit ainem mal in dacz refent sampnung gemain von ainem phunt, so man pest mag; von den andern schvellen sev haben ain ewiges liecht, daz daz alle nacht prinne liecht vnd chlar ob meines vater grab herrn Wohvnk, dem got genad. Also beschaydenleich, ob ich oder meyn gerben zv chvmftiger zeit daz egenant lechen wider haben wollen, so schvel wier den vorgenanten herren als vil vnd als gveten gelt geben azwo avf vnserm aigen als der ist. Daz di redd all staet gancz vnd vnczeprochen beleib, darvm gib ich in disen prief versigelten mit meynem vnd mit meins vetern herrn Jechscheks von Schekaw insigeln, der diser sach mit seynem jnsigel gezevg ist. Diser prief ist gegeben da von Christez gepuerd ergangen warden drevczehenhvndert jar dar nach in dem siben vnd vierczkistem jar an sant Merteins tag.

Source Fulltext: PANGERL, Stift Hohenfurth (=FRA II/23, Wien 1865) S. 90