Ich Vlreich der Ayterpech puriger ze Chrems vnd ich Katrey sein hausvraw vnd ich Peter sein sun vnd all vnser erben wier veriehen offenleich mit disem prief vnd tuen chunt allen den, di in sechent oder hoerent lezen, daz wier mit woluerdachtem muet vnd nach rat vnserr pezzten vreunt recht vnd redleich ze chauffen haben geben vnsern weingarten ledig vnd vnuerchumbert, der gelegen ist in der peunt neben Reychersperiger hof vnd haisst "das putzel“ mit perchmaysters hant hern Vlreichz di zeit hofmaister datz Gneuzzendorf in der erbern geystleichen herren hof von Alderspach, dem man all iar da von geit suben phenning Wienner muns ze puerchrecht an sant Michels tag, dem erwierdigen herren hern Dyetmarn di zeit probst ze Reychersperig und dem gottzhaus da selbs vmb vier vnd dreizk phunt Wienner phennig, di der eegenant weingart gestanden ist Karochen dem Juden von Lincz, den habent si mit vnserm guetleiehen willen von iem geloest vmb di vorgenanten phennig vnd ist ier erchaufftz guet, vnd wier vnd all vnser nachchoemen erben schulln fuerbas chain recht an dem vorgenanten weingarten nimmer mer gehaben, vnd waz in chrieg von vnsern wegen auf erstuend, den schull wier in auz tragen vnd richtich machen an alln irn schaden. Vnd schullen si daz haben auf vnns vnd auf aller der hab, di wier haben in dem lande ze Oesterreich. Mit vrchund des priefs, der versigelt ist mit dez vorgenanten perchherren insygel hern Vlreichs di zeit hofmaister datz Gneusendorf, vnd mit dez erbern mans insygeln hern Nyclas von Weytra di zeit statrychter ze Chrems, di ich vorgenanter Vlreich dar vmb gepeten han in an schaden, wann ich die zeit aygens insygels nicht gehabt han. Geben nach Christes gepuerd dreuczehenhundert iar in dem neun vnd fumfczkisten iar dez suntages nach sand Cholmans tag.

Source Fulltext: PANGERL, Anhang Stift Hohenfurth (=FRA II/23, Wien 1865) S. 395-396