Ich Wenisch ritter von Gomarsitz vergich offenbar mit dem brief vnd tuen chund allen den, die in sehent lesent oder hoerent lesen, daz ich mit woluerdachten muet mit gunst vnd mit rat meiner pesten vreunt ze der zeit, do ich iz wol getuen moecht, vnd pey meinem lebentigen leib geschafft vnd gegeben han erst nach meinem toed ain gantze hueb meines rechten eribs vnd aygen in dem dorff, daz da haizzet datz dem Trautmans vnd daz leit nahent pey ierm dorff datz dem Saeherleins, mit allen den nutzzen vnd rechten, di dar zve gehorent, si seinen chlain oder groez, wie di genant sint; vnd han daz getan also bescheidenleich, daz si nach meinem toed meiner vnd meiner hausfrawen Woisslawa vnd meines svns Wernhers, der baider got genad, vnd aller meiner voruodern sein jartag dar vmb begen schullen nach iers orden gewonhait. Vnd wer ie dez pytantz ampt phleger zden zeiten ist, der sol an dem selben meinem jartag alle iar geben vnd raichen ain mal ze pezzervng ierr phrvnt mit visschen mit weyn vnd mit semeln, daz si dester willichleicher vnserr sel gedenchen, den herren in daz refent, als verre di nvetzz von der obgenanten hueb geraichen muegen. Waer aber, daz ich oder mein erben di hueb vnd di nvetzze wolten ablasen, daz sol geschehen mit zehen schokken grozzer phenning, di man mit einer gewizzen meiner erben sol anlegen an ein ander aygen. Vnd daz den herren vnd dem chloster ze Hohenfuert daz also staet vnd vntzebrochen ewichleich beleib, dar vber gib ich in den brief versigelten mit meinem insigel vnd ze einer betzeugnuzze vnd pezzer staetichait mit hern Marquartz insigel von Barosching vnd mit meins suns Wenischen insigel, di durich meiner bet willen daz getan habent. Der brief ist geben do von Christi geburd ergangen warn drevtzehen hundert jar dar nach in dem fumf vnd sechtzkigistem iar an der ainlef tausent maid tag.

Source Fulltext: PANGERL, Stift Hohenfurth (=FRA II/23, Wien 1865) S. 132-133