Ego Benesschius de Conratecz residens in Lussnicz tenore presencium profiteor vniuersis et singulis, quibus presens scriptum fuerit ostensum, quia prehabito amicorum omnium consilio meorum voluntate et consensu dilecte Cune (?) coniugis mee necnon omnium heredum meorum discreto viro Wilhelmo protunc in Rosenberch procuratori suisque heredibus in villa Hatzlabs viginti sex grossos perpetui census cum omnibus iuribus et pleno dominio nil penitus in eodem michi vsurpando rite rationabiliter vero et iusto venditionis tytulo vendidi pro quinque sexagenis grossorum Pragensium, quas plenarie ab eodem presentibus recipisse me recognosco. Quem quidem censum Jacobus dictus Dvpezz ipsi Wilhelmo heredibusque suis censuare habebit, videlicet xiii grossos in festo sancti Jeorii et xiii grossos in festo sancti Galli, annis singulis perpetue daturos, promittens fide pura omni absque malo zelo vna cum disbrigatoribus et fideiussoribiis meis subnotatis, videlicet Bohuslao de Keblan nato Philippi et Jenisschio de Toden, in solidum omnes manu conjuncta et indiuisa dictum censum viginti sex grossorum iuxta approbatam et hactenus terre regni Bohemie conswetudinem obseruatam contra quemlibet hominem inpetentem seu inpetere volentem fideliter disbrigare; alioquin duo ex nobis, qui per ipsum Wilhelmum uel suos heredes moniti fuerint, vnus super alium non iudicando nec se per alterius absentiam excusando quiuis cum vno famulo et duobus equis ad prestandum obstagium debitum et conswetum in ciuitate Rosenberch ad hospitium ydonei hospitis nobis per ipsum Wilhelmum procuratorem prefatum uel suos heredes deputatum tenebimur subintrare nusquam abinde exituri, donec prefatus census viginti sex grossorum ut prefertur, ipsis sufficienter fuerit disbrigatus jure suprascripto. Si uero in eodem obstagio per vnam quindenam continuauerimus, dictus census iure quo premittitur, non disbrigatus extunc prestito obstagio uel non prestito in propriis bonis nostris, vbi conuenientius ipsi Wilhelmo suisque heredibus visum fuerit, de tanto censu in bonis nostris certis et liberis cum tercia parte plus superaucta condescendere debemus et tenemur, dolo et fraude quibuslibet procul motis. Et si nonnulla dampna ob non disbrigacionem dicti census perciperent (?) modo quocunque, que rite et racionabiliter poterint demonstrare, illa omnia ipsis promittimus resortire sub pena obstagii prius scripti. Et si vnum uel duos, quod absit, ab hoc seculo migrare contingeret, extunc alium eque bonum loco defuncti infra vnius mensis spacium a die obitus sui continue conputando statuere promittimus sub pena obstagiali prius dicta. Et quicunque hanc litteram de sepedicto Wilhelmi suorumque heredum habuerit voluntate, eidem jus conpetit omnium premissorum. In cuius rei testimonium sigilla nostra propria de nostra certa scientia presentibus duximus appendenda. Datum et actum anno domini millesimo trecentesimo nonagesimo septimo feria quinta ante sanctorum apostolorum Symonis et Jude.

Source Fulltext: PANGERL, Stift Hohenfurth (=FRA II/23, Wien 1865) S. 216-217