Johannes miseratione diuina sancti Angeli sacrosancte Romane ecclesie diaconus cardinalis in Germanie et nonnullis aliis partibus apostolice sedis de latere legatus specialiter deputatus, uniuersis et singulis Christi fidelibus presentes litteras inspecturis salutem in domino sempiternam. Splendor paterne glorie, qui sua mundum illuminat ineffabili claritate pia vota fidelium de ipsius clementissima maiestate sperancium tunc precipue benigno fauore prosequitur, cum deuota ipsorum humilitas sanctorum precibus et meritis adiuatur. Cupientes igitur vt monasterium beate Marie virginis in Altouado ordinis Cisterciensis diocesis Pragensis et capella beate virginis predicte sita in cimiterio eiusdem monasterii ac capella sancte Marie. Magdalene ante portam predicti monasterii congruis frequentetur honoribus fidelesque ipsi eo libencius deuocionis causa confluant ad eadem, quo ibidem dono celestis gracie uberius conspexerint se refectos, a Christi quoque fidelibus iugiter venerentur, de omnipotentis dei misericordia ac beatorum Petri et Pauli apostolorum eius auctoritate confisi omnibus et singulis vere penitentibus et confessis, qui predicta monasterium et capellas in natiuitatis circumcisionis epiphanie resurrectionis ascensionis et corporis domini nostri Jesu Christi ac penthecostes nec non in natiuitatis annunciacionis concepcionis purificacionis et assumpcionis beate Marie semper virginis ac natiuitatis beati Johannis baptiste dictorum Petri et Pauli apostolorum omniumque sanctorum ac sancte Marie Magdalene et ipsorum monasterii et capellarum dedicacionum videlicet ipsius monasterii dedicacionis a primis vesperis usque ad secundas vesperas eiusdem inclusiue deuote visitauerint annuatitn, et ad reparacionem conseruacionem ac augmentacionem calicum librorum vestimentorum et aliorum ornamentorum pro diuino cultu inibi celebrando neccessariorum quocienscunque manus porrexerint adiutrices, nos cardinalis et legatus prefatus pro qualibet ipsarum festiuitatum et celebritate ac dedicacione centum dies indulgenciarum de iniunciis eis penitenciis misericorditer in domino relaxamus, presentibus vero et perpetuis temporibus duraturis. In quorum fidem et testimonium premissorum presentes litteras per secretarium nostrum infrascriptum subscriptas exinde fieri nostrique sigilli oblongi iussimus et fecimus appensione communiri. Datum apud Chrompnaw Pragensis diocesis predicte sub anno a natiuitate domini millesimo quadringentesimo quadragesimo octauo indictione vndecima die vero vicesima mensis Aprilis. Pontificatus sanctissimi in Christo patris et domini nostri domini Nicolai diuina prouidencia pape quinti anno secundo. Jo. Vaultier secretarius.

Source Fulltext: PANGERL, Stift Hohenfurth (=FRA II/23, Wien 1865) S. 272-273