Reuerendo in Cristo patri domino Paulo abbati totique conuentui monasterii Altiuadensis ordinis Cisterciensis presentibus et futuris Pragensis diocesis omnibusque familiaribus prefati monasterii ordinis Seraphici patris nostri Francissi benefactoribus deuotissimis frater Johannes de Capistrano eiusdem ordinis minimus et indignus ac reuerendissimi patris generalis in omnibus partibus citramontanis quo ad confratres de obseruantia nuncupatos inmeritus vicarius generalis. Cum orationum suffragio salutari omnium incrementa virtutum quamuis ex caritalis debito omnibus teneamur, illis tamen longe amplius obligamur, quorum deuocionem certis beneficiorum indiciis frequentius experimur. Proinde vestre dilectionis sinceritatem attendens, quam ad nostrum et prefati patris nostri Francisci geritis ordinem, veluti clara experienta cognoui dignum putaui et diuine acceptabile voluntati, vt ab ipso ordine prorogatiuam sentiatis spiritualium gratiarum, verum quia nudi temporalibus bonis caritatis vestre subsidiis dignam reimpendere vicem nequaquam temporaliter valemus, spiritualibus nichilominus benefitiis, prout in nostris aput deum dominum nostrum seruamus, desideriis compensare spiritualiter affectamus. Eapropter ego qui licet indignus curam fratrum minorum de obseruantia nuncupatorum et sororum minorissarum sancte Clare seu sancti Damiani de obseruantia nuncupatarum et eorum religiosorum de penitentiis ordinum in partibus cismontanis habeo generalem, vos prefatos presentes et futuros et omnes pro quibus intenditis, ad confraternitatem nostram et ad vniuersa et singula nostre religionis suffragia in vita recipio pariter et in morte, plenam vobis participationem omnium carismatum et spiritualium bonorum videlicet missarum orationum suffragiorum offitiorum diuinorum jeiuniorium abstinentiarum disciplinarum penitentiarum peregrinationum inspirationum predicationum lectionum meditacionum contemplacionum obseruantiarum deuocionum et omnium aliorum spiritualium bonorum tenore presentium gratiose conferendo, que per fratres nostros et dictorum ordinum sorores necnon et aliorum de obseruantia ac penitencia ordinum siue de tercio ordine beati Francisci in partibus vltramontanis degentes operari et acceptare dignabitur clementia saluatoris, addens insuper de dono et gratia singulari, quod cum diuine placuerit voluntati de exilio instantis miserie vos vocare vesterque obitus multo aunuente domino tempore differendus nostro fuerit capitulo nuncciatus, idem volo, ut pro vobis fiat officium, quod pro fratribus nostris defunctis recitatis ibidem annuatim ex more per totum orbem fieri consueuit. Valeat feliciter vestra deuota et feruens Caritas in Cristo Jhesu domino nostro in eternum amen. Datum Crumpnaw in Bohemia die lune in octaua omnium sanctorum anno domini millesimo quadringentesimo quinquagesimo primo.||
Frater Johannes supra dictus manu propria me subscripsi.

Source Fulltext: PANGERL, Stift Hohenfurth (=FRA II/23, Wien 1865) S. 276-277