Vniuersis et singulis Christi fidelibus presentes nostras litteras inspecturis seu legi audituris Jeronimus dei et apostolice sedis gratia archiepiscopus Cretensis sanctissimi in Christo patris et domini nostri domini Pii diuina prouidencia pape secundi vicecamerarius, in regno Bohemie ac terris ciuitatibus opidis castris et locis in eo existentibus potestatem ordinarii habens salutem in domiao sempiternam. Licet is, de cuius munere venit, vt sibi a fidelibus suis digne et laudabiliter seruiatur, de habundancia sue pietatis, que supplicum vota excedit et merita, bene seruientibus sibi multo maiora retribuat, quam valeant promereri, nichilominus tamen desiderantes domino populum suum reddere accaptabilem et bonorum operum sectatorem fideles eosdem ad bene et deuote sibi seruiendum indulgenciis et remissionibus quasi quibusdam allectiuis muneribus inuitamus, vt exinde diuine fiant gracie aptiores. Dudum siquidem sanctissimus dominus noster dominus Pius papa prefatus certas suas litteras eius vera bulla plumbea cum cordula canapis more Romane curie impendendo bullatas sanas et integras non viciatas non cancellatas nec in aliqua sui parte suspectas sed omni prorsus vicio et suspitione carentes nobis concedendas duxit atque concessit, quarum tenor de verbo ad verbum sequitur et est talis: [Folgt die vorhergehende Urkunde], Cum itaque, sicut accepimus, parrochialis ecclesia sancte Catherine martiris et virginis in Horicz Pragensis diocesis libris calicibus crucibus vexillis vestibus paramentis seu ornamentis aliisque rebus inibi ad cultum diuinum peragendum necessariis sit quamplurimum destituta, nec eidem sufficientes, vnde sibi prouideri valeat de premissis, suppetant facultates, nos cupientes, vt ecclesia predieta congruis a Christi fidelibus frequentetur honoribus et eidem de paramentis seu ornamentis predictis oportune prouideatur, ipsi quoque Christi fideles deuotionis causa eo libencius ad eandem confluant et ad prouisionem huiusmodi necnon ad eius fabricam eo promptius manus porrigant adiutrices, quo ex hoc ibidem de dono celestis gracie vberius se conspexerint refectos, de omnipotentis dei misericordia ac beatorum Petri et Pauli apostolorum eius auctoritate confisi omnibus vere penitentibus et confessis, qui in natiuitatis circuncisionis epiphanie resurrectionis ascensionis et corporis domini nostri Jesu Christi ac penthecostes necnon conceptionis natiuitatis annunciationis purificationis et assumptionis atque visitationis beate Marie virginis ac natiuitatis beati Johannis baptiste necnon sanctorum Petri et Pauli atque Catherine predictorum ac sanctorum Felicis et Adaucti martirum ac dedicationis dicte ecclesie festiuitatibus necnon per octauas earundem festiuitatum, quarum sunt octaue, ecclesiam ipsam deuote visitauerint annuatim et ad prouisionem ac fabricam premissas manus suas porrexerint adiutrices, singulis festiuitatum et dierum octauarum earundem quadraginta dies de iniunctis eis penitenciis misericorditer in domino relaxamus, presentibus perpetuis futuris temporibus duraturis. In cuius rei testimonium presentes nostras litteras exinde fieri nostrique sigilli iussimus et fecimus appensione muniri. Datum Wienne Patauiensis diocesis anno a natiuitate domini millesimo quadringentesimo sexagesimo secundo, die vero septima mensis Octobris pontificatus dicti domini nostri domini Pii pape secundi anno quinto.

Source Fulltext: PANGERL, Stift Hohenfurth (=FRA II/23, Wien 1865) S. 298-300