Rodericus Portuensis, Oliuerius Sabinensis, Marcus Prenestinus, Julianus Ostiensis, Johannes Albanensis episcopi, Johannes Michael tituli sancti Marcelli, Johannes Jacobus tituli sancti Stephani in Celio Monte presbyteri, Petrus sanctorum Cosme et Damiani, Raphael sancti Georgii ad velum aureum et Johannes sancte Marie in Aquiro diaconi, miseratione diuina sacrosancte Romane ecclesie cardinales uniuersis et singulis Christi fidelibus presentes litteras inspecturis salutem in domino sempiternam. Splendor paterne glorie, qui sua mundum illuminat ineffabili claritate, pia uota fidelium de clemencia ipsius maiestatis sperantium tunc precipue benigno fauore prosequitur, cum ipsorum deuota humilitas piis sanctorum preeibus et meritis adiuuatur. Cupientes igitur ut capella sancti Theobaldi in Kienperg Piaggensis diocesis congruis frequentetur honoribus et a Christi fidelibus iugiter ueneretur ac in suis structuris et edificiis debite reparetur conseruetur et manuteneatur, libris quoque calicibus ornamentis et luminaribus ac aliis ibidem necessariis et oportunis decenter muniatur ornetur et decoretur, vtque Christi fideles eo libencius deuocionis causa confluant ad eandem capellam et ad illius reparationem conseruationem et manutentionem aliaque premissa manus promptius porrigant adiutrices, quo ex hoc ibidem dono celestis gratie uberius conspexerint se refectos, omnibus et singulis utriusque sexus Christi fidelibus uere penitentibus et confessis, qui in dicta sancti Theobaldi et sancti Vlrici nec non lune prima post festum resurrexionis domini Jesu Christi feria quinta quatuor temporum post festum sante penthecostes et dedicationis dicte capelle festiuitatum diebus a primis vesperis usque ad secundas vesperas singularum festiuitatum huiusmodi inclusiue eandem capellam deuote uisitauerint annuatim, et ad illius reparationem conseruationem et manutentionem aliaque premissa manus porrexerint adiutrices, ut prefertur, nos cardinales prefati humilibus dilecti nobis in Christo moderni abbatis monasterii de Altovado Cisterciensis ordinis dicte diocesis supplicationibus super hoc inclinati de omnipotentis dei misericordia ac beatorum Petri et Pauli apostolorum eius auctoritate confisi pro qualibet die predictarum dierum, quibus id fecerint, centum dies de iniunctis eis penitentiis misericorditer in domino relaxamus et quilibet nostrum relaxat, presentibus perpetuis futuris temporibus duraturis. In quorum omnium et singulorum fidem et testimonium premissorum presentes litteras exinde fieri mandauimus, sigillorum nostrorum et cuiuslibet nostrum iussimus appensione muniri. Datum Rome in domibus nostris anno a natiuitate domini millesimo quadringentesimo octuagesimo nono die uero sexta mensis Aprilis, pontificatus sanctissimi in Christo patris et domini nostri domini Innocentii diuina prouidentia pape octaui anno quinto. Ja. Quentinoti.

Source Fulltext: PANGERL, Stift Hohenfurth (=FRA II/23, Wien 1865) S. 359-360