||
Wir, Johans und Gunther, gebruder, grafen von Swarczburg, bekennen und tun kunt offinlich mit diesem briefe allen ||
den, die in sehent odir horent lesen, daz wir vor uns, unsir erben und nachkomen mit wolbedachtem mute, mit rate unsir ||
frunde und mit rechter wizzen dem allirdurchluchtigistem fursten und herren hern Karln, romschem keiser, zu allen zeiten me¬||
rer des reichs und kunige zu Beheim , unserm lieben gnedigen herren als einem kunige zu Beheim, seinen erben und nach¬ ||
komen, kunigen dem kungreich und der cronen desselben kungrichs czu Beheim erblich und eweclich umb funftausent ||
und funfczig schok guter pragescher grossen, die uns genczliche bezalet und in unsern schinberlich kuntlichen nutz gekeret ||
sein, ee dirre brieff gegeben sei, die vesten Spremberg, burg und stat, mit allen dorfern, leuten, herscheften, landen, guten, gerich¬ ||
ten, bennen, zollen, geleiten, vorsten, wiltpennen, gulten, zinsen, nutzen, velden, welden, pusschen, geiegden, vogelweiden, wysen, ||
weiden, wazzern, mulen, wazzerleufen, teichen viesschenen, bergen, grunden, sleten, gemerken, creizen, grenitzen, und alle nut¬ ||
zen oben und under der erden und ouch mit rittern, knechten, mannen, manscheften, lehen, lehenscheften, verlehenten guten, ||
kirchlehen und gotslehen, dienern, eigenen leuten, pfantscheften und allen andern zugehorungen, wie man die mit sunder¬ ||
lichen worten benennen mag, recht und redelich verkouft haben und verkeufen an diesem brieve und verzeihen uns vor uns, ||
unsir erben und nachkomen ewecliche alles rechten, ansprache, anredunge, die wir zu der obgenanten vesten Spremberg, burg ||
und stat, und allen iren zugehorungen, als dovor begriffen ist, gehabet haben, noch hetten odir haben mochten in dheinewis, ||
und verzeihen uns auch sunderlich aller hulfe geistliches und werntliches rechten und aller gesecze, keiserlicher und babst¬ ||
licher buche, der lande gewonheit und aller ander sache do mit dieser kouf in dheine weis mochte gehindert werden. Ouch ||
han wir Johan und Gunther egenante vor uns, unsir erben und nachkomen in guten trewen mit rechter wizzen globt und ||
globen in disem briefe, daz wir dem vorgenanten unsirn herren dem keiser als einem kunige zu Beheim, seinen erben und nach¬ ||
komen, kunigen, dem kungreiche und der cronen desselben kungrichs zu Beheim als von der vesten Spremberg, burg ||
und stat, und allen iren egenanten zugehorungen sullen und wellen gute stete werung tun, als in den landen recht und gewon¬ ||
heit ist. Und aller dieser sache zu urtkund und ewiger warheit han wir unsir insiegel an diesen brieff gehangen. Der geben ist ||
zu Prage nach Cristus geburt dreutzenhundirt jar dornach in dem sechtzigstem jar, an dem nechsten dinstag nach dem ||
Obristen tage .