Sigismundus dei gratia Romanorum rex semper augustus ac Hungariae, Bohemiae; Dalmatiae, Croatiae etc. rex. Notum facimus tenore praesentium universis, quod licet serenissimus quondam Wenczeslaus Romanorum et Bohemiae rex frater noster carissimus, dum ageret in humanis, certas villas videlicet Borchfrid, Saldennaw, Schonaw, Purchstall, Schonberg et Hinttryngen¹, ad abbatem, conventum et monasterium Sanctae Coronae ordinis Cisterciensis pertinentes, cum ipsorum beneplacito ad suam vitam habuerit et possederit, ad ipsos iam vice versa legittime devolutas, idcirco non per errorem aut improvide sed modo deliberato et de certa nostra scientia praefatas villas dicto abbati et conventui monasterii Sanctae Coronae et eorum successoribus reddidimus, applicavimus et confirmavimus habendas, tenendas et perpetue possidendas, adinstar aliarum possessionum dicti monasterii, quae tenuerunt etiam ab antiquo modo, successorum et officialium nostrorum impedimentis quibuslibet procul motis, revocantes et anullantes omnes litteras cuiuscunque tenoris, si quas in contrarium personis quibuslibet dedissemus, quas nullius decernimus fore roboris vel momenti, quas etiam tenore praesentium de certa scientia revocamus. Praesentium sub nostro (sic, nostrae) maiestatis sigillo testimonio litterarum. Datum Nurenbergae, die VIII. mensis Septembris, anno domini millesimo quadringentesimo vigesimo secundo, regnorum nostrorum anno Hungariae etc. XXXVI., Romanorum duodecimo, Bohemiae vero tertio.||
Auf dem Umbug links: Ad mandatum domini regis domino Gr. episcopo Pataviensi cancellario referente Michael praepositus Boleslaviensis.||
Auf der Rückseite: R(egistrata), Henricus Fye.

Source Fulltext: PANGERL, Goldenkron (=FRA II/37, Wien 1872) S. 414-415